Teknologia albisteak
Sorturen sententzia, hiru puntutan laburtuta
Sustatu
2011-04-01 : 17:04
Sortu alderdia legez kanpotik utzi duen sententzia gaur egin da publiko. Bederatzi epailek egin zuten horren alde Auzitegi Gorenean. Beste zazpik, aldiz, iritzi nagusiaren kontrako boto partikularra argitaratu dute. Guztira, ehundaka orrialde. Hedabide eta analistak ari dira beren irakurketak egiten. Gure iritziz nabarmenena da gutxiengoan geratu diren epaileek sententzia hiru puntutan nola txikitzen duten.
Argazkiak.org | 3 puntu Sorturen sententziaren kontra © cc-by-sa: sustatu
Horko pasarte hori boto partikularrekoa da, eta sententziak dituen hiru akats nagusiak deblauki botatzen ditu:
- Ez dago frogarik, baizik eta "errelato luze" bat, zeinean ezker abertzalea eta ETA gauza bera diren, eta Sortu sortzea ETAren agindu zuzen bat.
- Errelato horren oinarriak dira ETAren da 2009ko dokumentu bat, eta justifikatzen dute zita partzialekin eta uste justifikaezinekin. Uste horiek gezurtatzen dituzten probak alde batera utzi dira.
- Jurisprudentziak esaten zuenari muzin egin zaio erabat: alegia, alderdiaren estatutuetan dagoen indarkeriaren errefusatzeari balio erabakigarria ematen zion jurisprudentziak.
Dokumentuak:
- Gehiengoaren sententzia, Sorturen kontrakoa (PDF)
- Boto partikularra, Sorturen aldekoa (Scribd-en)
- Hemen itsatsita, boto partikularraren testu hutsezko bertsioa.
Beste pasarte pare bat.
Honako hau da gehiengoaren sententziakoa:
Argazkiak.org | ETAkoak zeuden Sorturen aurkezpenean © cc-by-sa: sustatu
Epaileen arabera, Sortu aurkeztu zen ekitaldian ETAko buruzagi nabarmenak izan ziren. Nonbait poliziak berandu jakin zuen, ez baitzituzten atxilotu.
Beste hau, berriz, boto partikularrekoa da, baina sententziaren puntu bitxi bat aipatzen du:
Argazkiak.org | Prozesu demokratikoa aipatzearekin kontuz © cc-by-sa: sustatu
Nonbait, ETAren dokumentu batzuetan "prozesu demokratikoa" modu jakin batean ulertzen da (indarkeria eta bide politikoen konbinazioa), eta nonbait Sortuk ere "prozesu demokratikoa" aipatzen duenez, zentzu horrekin egiten du. Adi denok, beraz, "prozesu demokratiko" bat aipatzen dugun bakoitzean espreski indarkeria babesten baitugu.