Zaharkitzapen programatua Cristina Enean
Cosima Dannoritzer zuzendari alemaniarra Donostian izango da asteartean (martxoak 15, 19.00etan), Cristina Enea Fundazioak antolatutako hitzaldi batean, Comprar, tirar, comprar bere azken dokumentala aurkezteko.
Zenbait tresna elektroniko iraungitze data jakin bat al dute? Bizitza erabilgarri mugatuarekin ekoizten al dira hainbat produktu? Comprar, tirar, comprar dokumentala galdera horiei eta beste askori erantzuna ematen saiatzen da, eta kontzeptu horri izen bat jartzen dio: zaharkitzapen programatua. Besteak beste inprimagailu baten kasua azaltzen du. Aparailu hori orri kopuru jakin bat inprimatzeko programatuta dago, eta behin kopuru horra iritsitakoan, merkeagoa izan ohi da inprimagailu berria erostea, matxura konpontzea baino. Horrek kontsumoaren gurpilean etengabe bueltak ematera behartzen gaitu, hondakin kopurua neurririk gabe haundituz. Phoebus kartel ilunaren kasua ere mahai gainean jartzen du dokumentalak. Kartel ezkutu horri esker, bonbilla ekoizleek bonbillen bizitza ordu kopuru jakin batera mugatzeko akordioa hitzartu zuten. Eta hori guztia, produktuen eskariari eusteko asmoarekin, ekonomia piztuta eta abiada osoan mantentzeko.
Comprar, tirar, comprar dokumentala antolatzeko, zuzendariak, Cosima Dannoritzer alemaniarrak bi urteko ikerketa burutu du, eta mundu osoko adituak elkarrizketa ditu, zaharkitzapen programatua agerira atera asmoz, orain arte ezezaguna genuen kontzeptua, baina dokumental honen ondoren, geroz eta gertuagokoa izango zaiguna. Dokumentala orain dela pare bat hilabete estreinatu zuen TVE kateak, baina orduko hartan, dokumentalaren bertsio laburra eskaini zuen (52 minutukoa). Oraingoan, Cristina Enea Fundazioan bertsio osoaren emanaldia izango da (75 minutukoa).
Horren guztiaren inguruan hitz egiteko, dokumentalaren elaborazio prozesuari buruz, zaharkitzapen programatuari eta dokumentalaren ondorioei buruz hitz egiteko, Cristina Enea Fundazioak Cosima Dannoritzer zuzendaria gonbidatu du Donostiara, martxoaren 15ean hitzaldi irekia eman dezan Cristina Eneako Ingurumen Baliabideen Etxean, arratsaldeko 19:00etan. Dokumentalaren zuzendariaren aurkezpenaren ostean, dokumentalaren emanaldia egingo da, eta ondoren hausnarketa eta galdera txanda izango da.
Atzo arratsaldean Cosima Dannoritzer zuzendariak Cristina Enea Fundazioan eman zuen hitzaldiaren, eta bere azken lana den
Comprar, tirar, comprardokumentalaren proiekzioaren arrakasta dela-eta, eta jende ugari aretoan sartu ezinik gelditu zela ikusita, bihar osteguna, martxoak 17, beste emanaldi bat eskaintzea erabaki du Cristina Enea Fundazioak.Emanaldia 19:00etan hasiko da Cristina Eneako Ingurumen Baliabideen Etxean, eta oraingo honetan, dokumentalaren ekoizlea den Joan Ubeda izango dugu bideokonferentzia bidez gurekin.
Espero dugu atzo hitzaldian egoterik izan ez zutenek, bigarren aukera hau aprobetxatuko dutela.
Atzoko eztabaida saioko argazkiak hemen ikusi ditzazkezue, eta eztabaida saioko audioa laister jarriko dugu zuentzat eskuragarri gure webgunean.