Ez dirudi Twitterrek bereziki maite dituenik Retweet iruzkinduak. Hau da, tankera honetakoak, hasieran berbaren batzuk eta gero RT edo ber-tuit hori:
Nik bai! RT @josubergara: RT @lontzo: RT @euskadi_irratia: Euskadi Irratiko twitterra estreinatu dugu! Ea jarraitzen gaituzuen!!
Twitterren interfaze berezkotik halakorik egiterik ez dago. Baina jende askok gogoko izaten du halakoa botatzea. Lagun batek galdera pribatua egin dit, eta Sustatu bidez azaltzea pentsatu dut, bide batez Echofon erabiltzeko gomendioa eginez.
Retweet iruzkinduak egiteko, tresna egokia Echofon da.
Echofon instalatzen da gehigarri gisa Firefox nabigatzailearen gainean. Beste nabigatzaileren bat erabiltzen baduzu, ez dago aitzakiarik: utzi albo batera hori, eta erabili Firefox euskaraz.
Echofonek egiten duena da Firefox leihoan, beheko eskuineko ertzean ikono bat jarri, eta tarteka, leihoa bera irekitzen du, jasotako azken tuitekin. Era berean, zeuregana zuzendutako aipuak edo mezu zuzenak ere erakusten dizkizu.
Argazkiak.org | Echofon bidez Retweet iruzkindua egin © cc-by-sa: sustatu
Retweet egiteko aukera ere ematen du Echofonek. Bere lehiatilan, mezu jakin batean gainean eskuin-botoia klikatu saguarekin, eta zenbait aukera agertzen dira, horietako bat da Retweet with comment. Goiko pantaila-irudian duzu adibidea.
Echofon-ek gainera, Twitter kontu bat baino gehiago erabiltzea ahalbidetzen dizu. Bat pertsonala, bestea kudeatu dezakezun elkarte edo erakunde batena... Etekin handiena ateratzeko Echofoni (eta Twitterri oro har) beste aholku hau ere kontuan hartu:
Hasteko, hori, 50-100 kontu artean jarraitu, denetarikoak, lagunak, ezezagunak, gertuko euskaldunak (arakatu Umap batzuk topatzeko), inguruko erdaldundak, eta urrutiagoko atzerritarrak.
Ubuntun eta GNU/Linuxen oro har Gwibber bezalako aplikazioak ere erabil daitezke, baita RT-ak egiteko ere.
Argazkiak.org | Gwibber euskaraz © cc-by-sa: assar
Aplikazio honekin gainera mezu bera bidal daiteke Twitter eta Identi.ca-ra, baina baita Facebook-era eta beste sare batzuetara.
Ñabardura txiki bat. Teknikoki, retweet iruzkinduak ez dira retweetak.
Twitterrek mezu bakoitzeko gordetzen du mezu hori zeinen retweeta den edo zeinen erantzuna. Eta, iruzkinduen kasuan, ez du horrela gordetzen.
Teknikoki, berdina da "Nik bai! RT @josubergara: (...)" mezua edo "Bai horixe, ADOS @josubergara: (...)" mezua. Kasu horretan, RT hori konbentzio bat besterik ez, baina Twitterren datubaserako testu hutsa.
Adibidez, mezu hau eta beste mezu hau bi mezu independiente dira teknikoki. Ez duzue ikusiko bat eta bestea lotzen dituen aurpegi txikirik ez ezer. Aldiz, lotzen da retweet garbia egin duen beste erabiltzaile batekin. Norbere orri edo timelinean ere desberdin tratatzen dira. Retwitt rankinetan eta abar ez dira kontuan hartzen. Eta beste kontu batzuk.
Arraioa, lehenago idatzi izan banu :-) Goikoa idatzi, Twidroyd ondo zebilela, eta 3 egunetara, ostiralean otsailak 18a, Twitterrek suspenditu egin ditu blokeatu, Ubermedia enpresaren mugikorretarako Twitter aplikazio bezeroak: Twidroyd (android) eta UberTwitter (iphone eta blackberry).
Twitterren esanetan Twitterren politiken aurka joateagatik
Izan ere, mugikorretarako aplikazio propioak bultzatzen ditu Twitterrek eta ez hirugarrenenak: Twitter for Android , for iPhone edo for Blackberry .
Ubermedia da UberTwitter, Twidroyd eta Echofon aplikazioen atzean dagoen enpresa eta ostiralean Twitterrek UberTwitter eta Twidroyd blokeatu, zarratu, suspenditu baditu..., hurrengoa Echofon izango da, akaso?
Zenbait medioetan diote aplikazioa hauei esker Ubermediak Twitter bidez sortzen zen trafikoaren %20a kontrolatzen zuela ! Izango da hori arrazoi nagusia? Baliteke.
Ubermedia enpresaren produktu ezberdinen suspentsioaren arrazoiaren inguruan ezer gutxi esaten du Twitterrek bere komunikazio ofizialean.
Sarean bila ibili naiz xehetasun gehiagoren bila, eta agerkari honetan aurkitu ditut.
Ubermedia nahiz Twitterreko arduradunek azaldu dituzte bertan xeheago arrazoiak. Ubermediak ez omen ditu Twitterren APIaren erabilera baldintzak errespetatu.
Arrazoi nagusiak hiru omen dira:
Ubermediako arduradunen esanetan, Twitterren APIaren erabilera arauak hausten zituzten ezaugarri horiek guztiak ezabatu dituzte. Besteak beste, UberTwitter aplikazioaren izena ere aldatu omen dute, eta orain UberSocial izena du.
Arau-hauste horiek konpondu bezain pronto aplikazioak berriz ere baimenduko dituztela esan omen dute Twitterrekoek.
Bide batez, esan dezadan TweetDeck aplikazioak ere ahalbidetzen duela iruzkindutako RTak egitea, beste gauza askoren artean. Idazmahairako nahiz mugikorretarako bertsioak ditu, gainera. Ni berriki hasi naiz erabiltzen (orain arte Echofon erabili dut nagusiki) eta bikain funtzionatzen du, batez ere kontu bat baino gehiago kudeatu behar badituzu.
Techcrunch-ek dioenez Ubermediako UberTwitter eta Twidroyd aplikazioak berriro baimenduko omen ditu Twitterrek . Ubersocial enpresatik bidalitako tuitak konfirmatzen duela dirudi : "Great news! Twitter has approved our changes, and we expect to provide a new version in about an hour."
Berriro erabiltzeko, baimendutako bertsio berriak deskargatu beharko dira.
Eta Haritzek dioen moduan, Twitterrek eskatuta, UberTwitter aplikazioaren izena UberSocial izatera pasatu da.
Interesgarria iruzkinen aukera. Android sistema erabiltzen duten mugikorretatik retweet iruzkinduak egiteko antzerako aukera interesgarriak eskaintzen ditu Twidroyd aplikazioak. Ondo dabil.
Gainera, aipatutako Twidroyd aplikazioa bai twitter edo bai software librea den identi.ca mikroblogging soziala egiteko zerbitzuekin erabili daiteke. Baina Twidroyd aplikaziotik aparte, gehiago badaudela uste dut.