Teknologia albisteak

Badator Sautrelaren 12. denboraldia

Sautrela

2010-10-02 : 11:10

Gaur, Urriak 2, SAUTRELA saioa 300. atalarekin itzuliko da. Hamaika denboraldi dira jada SAUTRELA ETB1eko pantailetan dela, eta denboraldi honetan larunbat bazkalosteetan ikusi ahal izango da arratsaldeko 15'30tan.

Denboraldi honetan ere, ohikoa duen filosofia eta estetikari eutsiko dio SAUTRELAk, letrei eta literatur sorkuntzari balio emanez. Euskarazko literaturaren nondik norakoak gertutik jarraituko ditu saioak, elkarrizketen eta erreportajeen bidez. Lehenengo atalean, esaterako, Irati Jimenez idazlea izango du gonbidaturik.

Honekin batera, erdarazko literaturari ere gainbegiratua egingo dio Sautrelak 12. denboraldi honetan ere; esate baterako, Frederic Beigbeder idazle frantziarra izango dugu hirugarren saioan, Un roman français liburuaz hizketan.

Iazko lantaldea zertxobait berrituta ageri zaigu udazken honetan. Erredakzioan Garazi Kamio, Lander Garro eta Yolanda Mendiola. Errealizadore Koldo Gutierrez eta Zuzendari/Aurkezle lanetan, Hasier Etxeberria.