Teknofiloen albistegia
6

Flipboard harrigarria da; aldizkari digital pertsonalizatu bat duzu esku artean

Erabiltzailearen aurpegia
Sustatu
2010-09-02 : 09:09

Appleren Ipad aparailu berrirako garatu den aplikaziorik interesgarrienetakoa Flipboard da. Komentario ugari dago sarean haren inguruan. Merezitakoak, Flipboard instalatu eta harekin ibiltzean jasotzen den inpresioa benetan harrigarria egiten baita: aldizkari digital bat, beti eguneratua eta zeure lagunen bidez filtratua.


Argazkiak.org | Flipboard, aurkibidea horizontalki © cc-by-sa: sustatu


Argazkiak.org | Flipboard azala © cc-by-sa: sustatu

Portada ikusgarri baten ondoren (hemen behean adibide bat), aurkibidea ageri zaio Flipboard erabiltzaileari.


Argazkiak.org | Flipboard aurkibidea bertikalki © cc-by-sa: sustatu

Aurkibidean, lehen bi koxkak garrantzitsuak dira, erabiltzaileak bere Facebook eta Twitter kontuak ematen dizkio aplikazioari, eta handik, edukia lortuko du tresnak. Ez baduzu Facebook edo Twitter, agian Flipboard ez da zeuretzat (ezta iPad-a ere). Gorago itsatsi dugu aurkibide adibide bat bi ikusmiratan, horizontalki eta bertikalki, Ipadaren orientazioaren arabera, diseinu moldaketa bat-bateko eta ondo kalkulatuak baititu Flipboardek.

Lehen bi atalez gain, gainerakoak, Twitterren oinarritzen dira. Zenbait atal, Flipboardek berak proposatzen ditu; haiek aurkitu izan dituzten Twitterreko zerrenda edo jario interesgarriak. Besteak, zuk zeuk gehitu ditzakezu. Adibidez, Joxe Rojasen kontua segituz, une jakin batean hau agertu zaigu:


Argazkiak.org | Flipboard © cc-by-sa: sustatu

Konturatzen bazarete, Flipboardek erakusten duena ez dira tweet edo 140 karaktereko mezu soilak: horietan aurkitzen dituen estekak analizatzen ditu, eta haietara doa, bertatik izenburuak, testu-hasierak, bideoak eta irudiak eskuratzeko. Adibidez, Facebook-eko lagun batek argazki sorta bat kargatu badu, Flipboardeko orri batean galeria dotore bat agertuko zaizu (argazkiak bezala, baita bideoak ere).


Argazkiak.org | Flipboard, Facebooketik eskuratutako argazkiak © cc-by-sa: sustatu

Beste lagun pare batek esteka jakin bat partekatu badute, eduki hori bereziki interesgarria dela erabaki dezake Flipboard-ek eta horixe nabarmendu. Zentzu horretan, Twitterretik agerkari digital pertsonalizatuak ateratzen dituzten beste aplikazio hauen antza du Flipboardek:

Edukia Facebook eta Twitterrekin lotuta egoten denez, aplikazio horietan zuzenean erantzun eta partehartzeko bide oso erosoa ere ematen du Flipboardek. Hona adibide bat, eskuman ikusten da iruzkin/erantzuna uzteko espazioa:


Argazkiak.org | Flipboard, eduki jakin bat komentatzeko © cc-by-sa: sustatu

Flipboarden erabilpenari buruzko bideo hau aurkitu dugu sarean, ingelesez baina interesgarria:

Erantzunak

leire narbaiza
2010-09-02 : 11:23

Haluzinantea da! Argazkietan ez da hain harrigarri ikusten, benetan. Imajina ezazue zuen lagunen argazki, aipu, esteka eta bideo aldizkari bihurtuta, itzeleko kalitatearekin eta handitu, txikitu eta iruzkinak egiteko aukerarekin! Flipantea! Ikusi arte ez sinestekoa!

Mikel Liz.
2010-09-02 : 11:24

Oporretatik bueltako hegazkinean Newsweek aldizkarian artikulu interesgarria irakurri nuen Flipboard zela eta. Hura idatzi zuen kazetaria ere txora-txora eginda zegoen aplikazio honekin, ea noiz ikus dezakedan zuzenean.

Iban Arantzabal
2010-09-02 : 11:36

Guztiz ados esaten denarekin. Bueno, "Ez baduzu Facebook edo Twitter agian Flipboard ez da zeuretzat (ezta iPad-a ere)" afirmazioa potolotxoa da agian, baina egia da erabiltzaile "aurreratuendako" ere ederra dela Flipboard. Hori bai, herenegun egon nintzen hiru urteko txiki batekin marrazkiak egiten eta esan hari ez dela beretzat iPad-a :-)


Flipada bat da Flipboard


Abuztu hondarrean eragin diot Flipboard-i. Abuztuan Twitter eta Facebook irakurtzeko gosaltzerakoan, baina konturatu naiz hori baino gehiago ere badela. Berri solteak "periodiko maketatu" agertzen zaizkigu aplikazio honen bidez. Ederra!


Hala ere, kontraesantxo bat sortu zait niri. Entzun eta entzun nenbilen Interneten maketazioak eta diseinuak zuen garrantzi erlatiboaz. Zerbait ikasi badut iPad-arekin, guztiz kontrakoa da. Asmatzen bada argazkiak erakusten, albisteen konposizioa egiten, bideoak ikustea ahalbidetzen (flashik ez) eta txukun aurkezten, erabiltzaileongan sortzen duen eragina n-koiztu egiten da. Eroso bihurtu, ageriago jarri edukia, egokiago, erabilgarriago... eta hau dena diseinuaren indarragatik delakoan nago.


Eskaparateen kontra jardun dut boz goran, baina justu eskaparate eder bat erakutsi dit Flipboard-ek. Hedabideetan dihardugunondako ikasgaia izan da. Edukiak badu garrantzia, baina aurkezten asmatu behar da. "Eskarmentuaren paperak" liburua aurrean izan barik dihardut, baina Anjel Lertxundiri irakurri nion udan edukia asko dela, baina ez dena. Hizkeran ere asmatu beharra dagoela zioen saiakerako pasarte batean. Uste dut, arrazoi osoa duela eta gehituko nuke diseinuan ere asmatu beharra dagoela hedabideon kasuan.


Bestetik, eta euskara erabiltzaileongan ipad-ak izan duen zabalkundeaz ez daukat daturik, baina gaztelerazko zein ingelesezko komunitatean hedabide handiak prestatu dira iPad-ean erakargarri izateko. Hori horrela, goizero "El pa�s" irakurtzea errazagoa eta erosoagoa da, eta horrela periodiko gehienak daude egokituta. Akaso, Chris Andersonek esandakoaren haritik (kritikatua ere izan da), konturatu naiz aplikazioetatik irakurri dudala prentsa, prentsa erdalduna. Eta eguneroko euskalduna bakoitzaren webguneetara joanda, normalean. Irakurketa modu hori Flipboard ezagutu eta gero aplikazio bakarrera mugatu daiteke. Ordaintzeko moduko aplikazioa ere bada, baina momentuz, doan dago iPad-erako. Egia izango da web irekitik plataforma erdi itxietara egiten dihardugula salto...


Luistxo Fernandez
2010-09-02 : 11:39

Egia da bai, flipatzekoa dela Flipboard. Leire Narbaiza eta Maite Goñi blogarien iPad-etan ikusi dut nik martxan, eta inpresio handia egiten du nola dabilen konprobatzeak. Esku artean duzunean, sentsazioa datorkizu (behintzat neuri hala etorri zitzaidan, eta irakurri dudanez hortik ez naiz bakarra), aldizkari edo egunkari paperezkoak ordezkatzera datorren zerbait dela, prentsa idatziaren egunak amaitzera doazela.


iPad hardware puska harrigarria ere bada, baina seguruaski tablet produktu kategoria baten lehena da, eta beste batzuk ere etorriko dira, Flipboard bertsioekin edo antzeko produktuekin, adibidez Android edo Chrome sistema eragileetan oinarrituta.


Era berean, Flipboard software pieza ondo akabatua da, baina hori bezain garrantzitsua da jabetzea hark zerbitzatzen dizun edukia Twitterretik datorrela, mezu laburren bidez osatutako iragazki sozial horretatik.


Goio Arana
2010-09-02 : 11:45

Bai, harrigarria da Flipboard. Orrien txantiloi ugari erabilita, sekulako itxura dotorea ematen dio norberak jarraitzen dituen edukiei.



Traba bat aurkitzekotan, esan nik batzuetan ez dudala jakiten Facebook-en nabilen ala Twiterrenn! biak ala biak itxura oso antzekoa dutelako.

Maite Goñi
2010-09-02 : 12:40

Flipboard aplikazioaren aurretik paper.li-rekin hasita nengoen. Benetan zoragarria iruditzen zitzaidan albisteak eta edukiak jasotzeko modua. Gero, hau etorri zen, hasieran pertsonalizatzeko aukerarik gabe eta gero edukien pertsonalizazioarekin. Flipatzeko modukoa! Horixe da probatu ahala, burura etorri zitzaidana. Nik ere, Luistxoren inpresio berbera jaso nuen, paperezko egunkari edota aldizkariek egin dutela berea: erosoa, erakargarria, anitza (estekak, irudiak, bideoak...konbinatzen ditu). Bainaren bat jartzearren, edukien filtrazioa oraindik hobetu beharrean daudela esango nuke (paper.li-ren moduan, etiketak edo twitter zerrendak jarraitzeko aukera...). Hori eta pertsonalizatzeko kutxa gehiago sartzeko aukera. Eskatzeagatik...
Dena den, iPada ez duenarentzat, ordenagailuan ikusteko auekra hau ere ondo dago: paper.li/sustatu

Erantzun

Twitter ikonoa  Facebook ikonoa  Sartu