Abuztuko iragarpen teknologikoetako bat izan da Facebook-ek martxan jarri duela geo-aplikazio propioa, Check-in egitekoa. Kontzeptu honetaz jardun izan dugu Sustatun, une jakin batean non zauden adierazteko aplikazio mugikorrena, baina Facebook-ekin beste maila batera iritsiko dela ematen du: norekin zauden ere esan ahal izango duzu, argazkietan bezalatsu. Beste alde batetik, check-in kontzeptua tokietatik haruntzago ere zabaltzen ari da, kultura kontsumora.
Tuentik ere egin zuen lekuak eta check-in egitekoa, baina Facebook-ek abian jarritako Facebook Places honek puntu interesgarri bat gehitu dio: jendea etiketatzea. Hau da, toki batean zaudela esaten duzu, eta gainera, zurekin nor dagoen esan dezakezu. Pribazitate arazoak sor daitezkeela argi dago, ez bazabiltza listo: hona analisi bat ZDnet-en.

Momentuz iPhone 4rako bakarrik, eta AEBetan. Ez da web bidez gehitzen informaziorik, ezin duzu check-in egin, GPS gaitasuna duen telefonotik baizik, kokapena ziurtatzeko edo.
Check-in kontsumo kulturalean: GetGlue
Check-in egitearen kontzeptua aurrera doa. Eta ez bakarrik lekuekin, Miso eta Glue/GetGlue aplikazioek uzten dizute "kultura kontsumoan" check-in egiten. Miso bakarrik telebistarako, baina Glue osoagoa da:
- Musika
- Telesaioak
- Filmak
- Liburuak
- edozein gai ere bai, Wikipedian (edo beste toki batzutan) agertzen bada
Glue-rekin review edo kritika egin dezakezu egin dezakezu, partekatu Twitter eta Facebook-en, eta check-in egin, esanez hori irakurtzen ari zarela, edo ikusten, edo gai horren gainean pentsatzen. Firefox-erako gehigarri interesgarri bat ere badu Gluek eta, Foursquarek bezala, domina edo txapa bereziak erabiltzaile saiatuenentzat, eta baita Foursquaren alkatetzak diren bezala, hemen guru izendatzen zaituzte item kultural jakin batean.