Tweet egiteko Twitterren botoi ofiziala, Sustatun dagoeneko martxan
Twitterrek sarean edukiak partekatzeko Tweet botoi ofiziala sareratu zuen atzo. Kode lerro apur batzuekin egokitzen ahal da webgune bat Tweet botoira, eta aproba egiteko zein oihartzuna lortzeko egokia izan daitekeelakoan, Sustatun ere jarri dugu martxan. Azalean ez, baina albiste bakoitzera sartuta, guztietan dago tweet egiteko botoia.
Izenburuaren gainean duzue tweet botoia. Lehen artikulua inprimatzeko aukera geneukan hor, baina, erabiltzen ote zuen inork?
Argazkiak.org | Sustatun inprimatzeko aukera © cc-by-sa: sustatu
Tweet botoi berriaren ondoan jarraitzen du Sustatuko artikuluaren berri e-postaz lagun bati bidaltzeko aukerak.
Tweet botoia erabiltzeko, Twitterren kontua eduki behar da, kontua baita aplikazio horretan hedatzea nonbait zerbait ikusi duzula interesekoa (horretarako da botoia). Klikatuz gero, leiho bat irekiko zaizu, eta hortxe joango da Sustaturen artikuluaren izenburua eta beste pare bat datu. Zuk zeuk uki dezakezu testua zeure erara, betiere 140 karaktereen muga horretan. Sustatuko URL edo helbidea Twitterrek berriki martxan jarri duen t.co helbide laburtzailearen bidez geratuko da laburtuta.
Botoia sakatutakoan agertuko zaizun interfazea ingelesez dago. Hizkuntza aukerak murritzak dira: ingelesa, gaztelania, frantsesa, alemana, japoniera. Ingelesez barik gaztelaniaz jarri beharko genuke?
Egunen batean jarriko dute Twitter euskaraz, eta orduan moldatuko dugu hori. Bere garaian boluntarioak eskatu zituen Twitterrek aplikazio hainbat hizkuntzatan jartzeko, eta euskaldun batzuk prestu azaldu ziren, baina garapenaren alderdi hori geldi daukatela ematen du. Izatez, itzulpenak egiteko lekuan, hainbat hizkuntzatan boluntario agertzeko aukera zegoen lehen, eta euskaldunak ere gehitu ziren haien artean, baina orain formularioa ere kendu egin dute.
Tweet egiteko botoia zenbait modutan moldatu daiteke:
- Laguntza azkarra, di-da batean sortzeko botoia.
- Dokumentazioa, egokitzapen zehatzagoak egiteko.
Orain arte, Tweetmeme izeneko zerbitzuak eduki izan du Twitterren edukiak partekatzeko botoitxoaren aplikazio erabiliena. Twitterrek berak dio Tweetmemerekin elkarlanean eman dutela urrats hau, baina azken batean zera ematen du honek: beste batzuen zerbitzu paralelo bat fagozitatzera datorrela anaia nagusia. Twitterren inguruan hazitako beste aplikazio batzuei ere gerta dakieke hau, adibidez Bit.ly helbide laburtzaileari terrenoa jan diezaioke t.co Twitterren laburtzaile propioak.
Erantzunak
Tweetmeme-ren aldean, abantaila batzuk ikusten dizkiogu.
- Lerro pare bat eta listo, hori gaurkoz; teknikariek lan egiteko aukera aurreratuagoak, irailean oporrak amaitzen direnean.
- Tuiteatzera doan mezuaren kustomizazioa zure gustora. Adibidez, orain Sustatun daukagun moduan, artikuluen gaia hashtag gisa sartzen dugu mezuan, hala nola #blogak edo #sustatu
- Partekatzen den URL-a egokitu daiteke: oraingoz ez dugu egin, baina irailean botoi honek ematen digun trafikoa zehatz neurtzeko moduan egongo gara, Google Analytics tresnarentzako kode berezituak gehituta.
- aukera biralak, Sustatu (+ beste batzuk) jarraitzeko gomendioa egiten du aplikazioak tuita bidali ondoren ez bazara Sustaturen
jarraitzaile. - url laburtzaile propioak erabiltzeko aukera, edo bestela, t.co
zerbitzuarena, zeinak, Twitterrena izaki, API bidez aukera
inportanteak emango dituen etorkizunean.
Zenbat tweet egiten diren ikusten ahal da, aukeratuz gero. Diseinuaren aldetik ez dugu hori hobetsi oraingoz, ukiturik sinpleenera jo baitugu: baina agian kopurua ematen duen lauki handiago bat jarriko dugu, eta tokiz aldatu ere bai. Pare bat lagunek esan digute ezkutu samar dagoela. Pentsatuko dugu horren inguruan. Zure eta denen ekarpenak ongi etorriak dira.
Blog ezberdinetan Tweetmeme daukat zerbitzu hau ezagutu nuenetik, eta begiratzen ari naiz ea "botoi ofizialak" zer gehiago eskaintzen duen (aldaketa egiteko), baina ez dut garbi ikusten zein den ekarpena.
Tweetmemen, alde batetik, ikus daiteke zenbatekoa izan den albiste horren oihartzuna (zenbat RT egin diren), eta, bestetik, zehaztasunak (norena den artikulua, pertsona horri jarraitzeko aukera eta zeintzuk izan diren RT egin dutenak, besteak beste). Hori guztia edonork ikus dezake.
Zergatik ipini duzue Susatun hau eta ez Tweetmeme? Alderaketaren bat edo egin duzue bien artean?