Teknologia albisteak

Intxorta magaleko ibilbide tematikoa inauguratuko da igandean

Sustatu

2010-05-22 : 12:05

Bihar igandea, hilak 22, inaguratuko da 1936-37ko gerraren inguruko ibilbide tematikoa Intxorta magalean, Elgetan.

Horrez gain, Elgetako Espaloia antzokiaren ondoko areto pare bat, harrera gune bezala prestatu dira.

Armak, garaiko egunkariak, gudarien lanabesak
Izen guztiak aurpegi guztiak bideoa
Panel informatiboak
Bergara, Elgeta, Arrasate, Elorrio, Eibar inguruko maketa handi bat, gerrako gora beherak azaltzen dituena
Testigantzekin egindako bideoa (25 minutu)

Ibilbideak 12 puntu ditu, panel informatiboekin. Lubakien lehen lerroa, bigarrena, trintxera egokituak, gudarien txabolak denetarik ikusteko aukera izango du bisitariak.

Intxorta 1937 kultur elkarteak, Elgetako herritarrek eta Elgetako udalak egindako lana da hau.

Inaugurazio ekitaldia:

Maiatzaren 23an, domeka, eguerdiko 12:00etan. Espaloia Kafe Antzokia, Elgeta

Erantzunak

Goio Arana

2010-05-23 : 23:19

Zorionak Elgetako Udalari, Intxorta 1937 kultura elkarteari eta Elgetako herritarrei: egitasmo txalogarria jarri duzue abian eta horren aurkezpen ederra egin duzue gaurkoan! Izan ere, Intxortako ibilbidea eta Elgetako harrera gunea inauguratzeko Elgetan gaur eguerdian egindako ekitaldia oso hunkigarri eta polita izan da.

Ekitaldi-omenaldiari hasiera emateko, gaurtik aurrera harrera gunean ikusgai egongo den 20 minutuko ikus-entzunezkoa estreinatu dute; ondoren, Joseba Tapia trikitilariak gerra denborako emozioz betetako kantuak abestu ditu; azkenean, hitzalditxo bana bota dute egitasmoan buru belarri ibili direnen ordezkariak hala nola, Juan Ramon Garai Intxorta 1937 kultura elkarteko ordezkariak, Edurne Alberdik Elgetako Udaleko turismo zinegotziak, Maria Jesus Aranburu Gipuzkoako Foru Aldundiko Kultura diputatuak eta Oxel Erostarbe Elgetako alkateak.

Aurkezpen ekitaldia amaitu eta gero, Espaloia aretoa goraino bete duten herritarrek harrera guneko erakusketa ikusi eta taldeka, Asentzioko lubaki berreskuratuak ikusteko aukera izan dute.

Esandakoa, mila esker eta zorionak!

Argazkiak.org | Intxortako lubakiak © cc-by-sa: goioarana