HABEko zuzendaria: That's all, folks
Gizonek erabiltzen dute gorbata bere buruak inportanteago emateko. Nahita edo gizarte ohiturek behartuta, gustatu ala ez, ezin uka gizon batek traje eta gorbata janzten dituenean, serioago, boteretsuago, aberatsago edo dotoreago dirudiela. Baina ia gizon bezain beste modu daude gorbata eramateko, azkenean bakoitzak bere ikutu pertsonala ematen dio, eta ondorioz gorbatak auskalo zeren erakusgarri izaten bukatzen duen.
Badaude gorbata uniforme huts moduan eramaten dutenak. Lanak edo egoerak behartutako zerbait da, eta ondorioz gorbata diskretuak, marrazki barikoak edo marrazki txikidunak aukeratzen dituzte. Koloreak, modak eta korapiloak bost eurei. Horrelako asko daude, adibidez, saltzaileen artean.
Gero badira bere burua hain inportantetzat izanik, irudia traje-gorbataz baino ikusten ez dutenak. Saiatzen dira gorbatak nolabaiteko dotorezia izaten, baina ezin asma: kolore argiak eta modakoak aukeratu arren, Windsor korapiloa sekula ez dago bere tokian, beti alkandoraren lepotik bi zentimetro behera.
Edo gorbata beti-beti okertuta daramatenak, erreparatu Patxi Lópezenari.
Edo V moduko eskotedun jertsearen azpian daramatenak funtzionario zaharrek bezala. Edo okerrago, U moduko eskotedun jertsearen azpian daramatenak, garai batean Arrasateko Caja Laboralekoak La Bilbainara bazkaltzera joaten zirenean bezala.
Edo setazko gorbata zoragarriak jakaren poltsikoan daramaten zapiarekin bat datorrela janzten duten gizonak, bakarrik Bilbon eramaten daiteken estiloarekin.
Eta gero, hesi guztiak puskatuz, gorbatari per se daukan garrantzia kendu nahi diotenak: HABEko zuzendaria Lukas / Duffy ahatearen gorbata batekin. Seriotasuna eman nahi diot eta aldi berean seriotasuna kendu nahi diot, dirudi dabilela pentsatzen.
Gora transgresioa! Gora Lukas ahatea! Gora marrazki bizidunen maitaleak! Eta gora barrea eragin nahi duten euskara irakasteko erakundeburuak, eurek lortuko dutelako klaseak pipergileentzako erakargarri egitea.
Korbata hori Eugenio Mujika HABEko zuzendariarena da, eta Meskalekoak blogekoak deskubritu zuten, Beterriko Liburua sariaren emanaldian, Irati Jimenezi eman ziotenenan saria.
Erantzunak
Lehenengo postari erantzunez, ez dut uste Lukas ahatearen gorbata itsuan aukeratzen denik... Edo zuk jarriko ahal zenuke Plutoz jositako alkandora bat nahi gabe? gainontzeko alkandoren gainean zegoelako? Ez dut uste...
Neri primeran iruditzen zait Habeko zuzendariaren keinu hau! Begira nola jazten diren gure politikoak eta ikusi beren emaitzak! negargarriak!
Eman diezaiogun gure bizitzari umore ikutu bat jaun andreok!
@Daysi Donald: politikari baten itxura imajinatzen dugunean, halako irudi instituzional bat datorkigu burura, zuk aipatzen duzun irudi aspergarri hori. Baina politikari berak itxura informalago bat azaldu nahi duenean, alderkideen mitin batean edo kanpainian ari denean, ez al du janzkera aspergarri bera agertzen beste estilo batean? Arazoa, beraz, politikariena baino pertsonala dela esango nuke. Eta, beste alde batetik, norberaren janzteko era gorbata baten aukeraketari mugatuz gero, zer izango litzateke hurrengo batean jantzi beharrekoa, Bugs Bunny-ren gorbata?
@Mickey Mouse: nolabaiteko paralelismoa egitearren, testu bat idazten dugunean ordenagailuz aukera daukagu testu horretako berbaren bat edo esaldi bat nabarmentzeko: hizki larriak erabiliz edo azpimarratuz, etab. Era berean, janzten garenean eta uste dugunean elementu konkretu bat, gorbata kasu, besteen gainetik nabarmentzen dela, aukeratu beharreko beste elementuak horren mesedetan jarri behar direla iruditzen zait, alkandora eta jaka neutroagoak aukeratuz. Horregatik da nire iruzkinean agertzen nuen zalantza gorbataren aukeraketa konszienteari buruz.
Pare bat kontu amaitzeko:
- emakume politikarien janzkerak beste post bat mereziko luke.
- badira ezberdintasunak gizonezko politikoen artean janzterako orduan: adierazgarriagoak alderdi ezberdinetakoen artean beharbada (Oskar Matute eta Jaime Mayor Oreja), baina baita alderdi berekoen artean (Arnaldo Otegi eta Rafa Diez Usabiaga).
Ba niretzat, HABE-ko zuzendariaren itxurari erreparatuz, gehiago iruditzen zait armairuko ateak zabaldu zituela eta, zer jantzi ez zekiela, begiak itxi eta itsuan aukeratu zituela gorbata bat, alkandora eta jaka. Eta hori ez da transgresioa, transgresioa diskurtso baten barruan kokatu behar delako esango nuke, koherentzia baten barruan, eta, gorbataren asuntoaz aparte, alkandora hori ez dator bat, ezta gutxiago ere, jaka horrekin. Gainera hirurak elkarren parean jarrita nahasmenaren edo estilo ezaren sentsazioa baino ez dute adierazten.
Beste alde batetik, bai, egia da gorbatak baduela halako balore sozial bat, nolabait esatearren, edo ikur baten antzera funtzionatzen duela, status edo ordenu baten adierazle esan nahi dut. Baina hori ez al da gertatzen arropa guztiekin? Azken batean guztiok bizi gara gizartearen barruan bakoitza bere taldean, badugu janzteko modu bat eta zein zaila suertatzen da batzutan norbere nortasuna adieraztea, ezta? Politikoki jatorrago balitz bezala kirol arropa garestia jaka eta gorbata bat baino.
Egunen batean Euskal Herria bihurtuko da Euskal Hiria? Janzkeran ere, esan nahi dut. Bitartean, Paul Weller entzuteko aukera dago, "In the city" abesten 1977an. Bueno, soinean dituen galtzerdi zuriak ere ez dira nire gustokoak, beltzak nahiago nituzke. Enfin ;-)