Inauteriak sarean: Eibarko koko-eskea twitter bidez jarraitu daiteke

Bihar, larunbata, otsailaren 6an aterako gara koko-dantzan eta koko-eskean. Eibarko Mandiola eta Agina baserri-auzoak bisitatuko ditugu.


Koko-dantzariek makila-dantza egiten dute baserri bakoitzaren aurrean, eta mamarruek saria pasako dute baserritarren opariak jasotzeko. Arratsaldean, 19.00etatik aurrera Eibarko erdiguneko kaleetan ibiliko da konpartsa osoa Mauxitxa txarangak lagunduta.

Koko-eskearen ibilbidea

Ohi bezala Merkatu plazan egingo du lehen agerraldia koko-dantzen konpartsak, goizeko 8:30ak aldera. Ondoren baserriz-baserriz bisita, koko-dantza eta eskea egiten hasiko gara. Zozola, Zozolabarri, Aritxuluetabarri eta Aritxuluetara Mandiola auzoan, eta Altzerreka, Zumaran, Mendibil, San Roman, Aboagaazpikoa, Aboagainekoa, Suinagatxo, Suinaga, Gorostiaga, Arizpe, Atxekoa, Orbesoaren , Aginagainekoa, Oregizahar, Arandobarrena, Arandoguena eta Arandoetxebarri Agina aldean. Ikus hemen Aginako ibilbidea mapan:



Iluntzean, 19.00etan Anbulategiko parkean elkartuko gara koko-konpartsa eta koko-festan parte hartu nahi duten guztiak, eta Mauxitxa txarangaren doinura erdiko kaleetan ibiliko gara. Ekitaldi irekia da hau eta nahi duten guztiak daude gonbidatuta, koko-jantzi eta festan gurekin batera parte hartzera.

Inauteriak twitter bidez

Aurten koko-dantzen nondik norakoak zuzenean erretransmitituko ditugu twitter bidez. Hainbat modu daude koko-eskearen nondik norakoak jarraitzeko:

• Gure twitter kontua (/kezkadantza) jarraituz.
• Kezka dantza taldearen blogean Coveritlive tresna jarriko dugu eta horren bidez gure mezuak ikusi eta nahi izanez gero zuen komentarioak bertan utzi ahal izango dituzue.
• Facebook-en gure kontuan.

Koberturak eta festak aukera ematen digun neurrian, koko-eskearen nondik norakoen berri emango dugu mezu laburren bidez. Ez espero kontakizun luzerik, baina gutxienez non gabiltzan eta eskea zer moduz doan kontatzen joateko asmoa dugu. Hori bai, festa nahi duenak hobe du etxeko epeletik urten eta kalera etortzea.