Juantxo Lopez de Uralderen hitzaldia ostiralean aldaketa klimatikoaren kontrako borrokaz

Cristina Enea Fundazioa

2010-01-20 08:01

Denok (edo zuotako askok bai behintzat) izango dituzue gogoan abenduan Kopenagen egin zen Klimaren Aldaketaren Kontrako Nazioarteko Goibileraren irudiak. Mundu mailako hamaika estatuburu, gobernu-ordezkari, gobernuz kanpoko erakunde eta bestelako eragile bildu zen klimaren aldaketa saihesteko neurriak adosteko asmoz. Harturiko konpromisoak urriak izan ziren ordea, eta sorturiko zalantzak asko. Cristina Enea Fundazioak Goibilera horren nondik-norakoak azaltzeko paregabeko protagonista ekarriko du Donostiara ostiralean: Juantxo Lopez de Uralde, Greenpeacek Espainian duen ordezkaritzaren zuzendaria.

Ezaguna egin zen Juantxo donostiarra mundu osoan, protesta ekitaldi baketsu bat egiteagatik espetxeratu baitzuen poliziak. Hainbat egun eman zituen atxiloaldian eta jasandako tratua gogor salatu eta gaitzetsi zuen Greenpeaceko aktibistak. Ostiralean Donostiako udaletxean emango duen hitzaldian, Lopez de Uraldek Kopenageko Goibileran hartu ziren eta hartu ez ziren erabaki eta konpromisoen inguruan hausnartzeaz gain, mugimendu ekologistak etorkizunean egin beharreko bideari buruz ere hitz egingo du, 'Aldaketa klimatikoaren kontrako borroka: Kopenageko Goibileraren ostean zer?' izeneko hitzaldi irekian.

Ekitaldia ostiralean, urtarrilaren 22an, arratsaldeko 19:00etan izango da, Donostiako udaletxean, Cristina Enea Fundazioak antolatuta.

Erantzunak kargatzen...

Juantxo Lopez de Uralderen hitzaldia ostiralean aldaketa klimatikoaren kontrako borrokaz

Jarraitu gaitzazu