Gotzon Garateri omenaldia, Elgoibarren

Elgoibarko Udalak eta Elgoibarko Izarra Kultur Elkarteak elkarlanean antolatu dugun omenaldi-programak bi helburu nagusi ditu:

1. Gotzoni elgoibartarron gorazarrea eta esker ona azaltzea.
2. Gotzon Garateren izena eta izana ezagutzera ematea.

Eta bi helburu hauek ahal dugun txukunen betetzeko helburuarekin, honako programa prestatu dugu:

Herri-omenaldia:

Urriaren 8an izango da.

• Arratsaldeko 19:00etan Gotzonen omenezko oroitarria bistaratuko dugu haren jaiotetxean.
• Ondoren, Musika Eskolako auditorioan omenduko dugu Gotzon. Omenaldian, bideoak, lagunen eta etxekoen testigantzak, herritarren berbak, kantuak eta antzerakoak izango dira.

  Gotzonen lanen erakusketa

Urriaren 9an Gotzonen lanen gaineko erakusketa inauguratuko dugu. Estreinako eguneko erakusketa, gainera, Gotzonen ikasle eta lankide izan zen Jabier Kaltzakortak gidatuko du.

Inaugurazioaren ondoren, Gotzoni hainbeste gustatzen zitzaion gauza bat egingo dugu: kantatu. Kantu kalejira antolatu dugu, eta kalez kale jardungo dugu kantari.

Gehigarri berezia, Barren astekarian

Urriaren 16an Gotzoni eskainitako gehigarri berezia argitaratuko dugu Barren astekarian. Gehigarrian, urriaren 8ko omenaldiko erretratuekin batera, iritzi artikuluak, Gotzonen etxekoak eta txikitako lagunak, eta beste hainbat kontu ikusi eta irakurriko dugu.

Hitzaldi-zikloa

Omenaldi-programarekin amaitzeko, hiru hitzaldi eta ikuskizun bat izango ditugu.

• Urriak 21: "Eskerrik asko, Gotzon. Gotzon Garate, bidegile". Miel Anjel Elustondo.
• Urriak 28: "Euskararen jatorria, zalantza artean igerian". Juan Martin Elexpuru.
• Azaroak 4: "Euskaltasunaren norabideaz oldozpen batzuk". Jon Sarasua.

Ikuskizuna:

Azaroak 11: "Mende baten aldarria" bertso-ikuskizuna. Xabier Amuriza eta Jon Maia.

Hitzaldiak Elgoibarko Kultur Etxeko hitzaldi-gelan izango dira, arratsaldeko 19:00etan hasita. "Mende baten aldarria" ikuskizuna, berriz, Musika Eskolako auditorioan izango da, ordu berean.