Teknologia albisteak
5

Jaurlaritzaren edukiak irekitzeko eta partaidetzarako proiektua: irekia.euskadi.net

Erabiltzailearen aurpegia
Sustatu
2009-09-23 : 12:09

Dirudienez Eusko Jaurlaritzak euskadi.net atariaren edukia ireki nahi du, parte hartzeko eta edukien berrerabilpenerako elementuak gehituz. "Gobierno Vasco Irekia" deitu diote proiektuari.

Patxi Lopezen prentsaurreko bati buruzko informaziotik abiatuta jakin dugu proiektu honen berri. Lehendakariak erabilitako Prezi aurkezpenera lotura bat dago Jaurlaritzaren webgunean, eta Jorge Valiño izeneko erabiltzaile batek igotako dokumentua da. Kontua da Lopezentzat egindako aurkezpen horrekin batera, beste hau ere igo duela erabiltzaile horrek.

Oraindik ez dute publiko egin, baina badirudi bere aurkezpena prestatzen ari direla. irekia.euskadi.net helbide horretan sartzeko erabiltzailea eta pasahitza eskatzen baitzaizkigu.

Helburua "pertsona oro Gobernuko eta erabakien parte sentitzea" da, txosten honen arabera, hiru zutabetan oinarrituta:

  • Gardentasuna. Datuen eta informazioen irekiera denbora errealean eta doan.
  • Partaidetza. Neurri, lege eta erabakien inguruko iritziak, bere sorkuntzatik (baita onartuak izan baino lehen ere). Gobernuaren erabakiak bideratzen lagundu dezakete.
  • Kolaborazioa. Datuen berrerabilpena, Creative Commons.

Horretarako software librea erabili nahi dute, eta Copy Left-aren aldeko apostua egin, Euskadi.net atarian lizentzia bat estandarizatu bitartean. Hortik aurrera, lizentzia amankomun bat erabiliko dute.

Hizkuntzak

Euskaraz eta gazteleraz egongo dira edukiak, eta atzerritarrentzat interesgarria izan daitekeen informazioa ingelesez ere argitaratuko dute. Horrez gain, beste hizkuntza batzuen eskaera-maila aztertzen ari omen dira.

IP telebista

Guztia Lehendakaritzako Komunikazio Zuzendaritzatik kontrolatuko du Ana Betanzosek, aurkezpen honetan zehazten denez. Patxi Lopezek IP telebista izango du atariaren barruan, eta zenbait ekitalditan streaming ere erabiliko omen dute. Bideo guztietan iruzkinak egiteko aukera izango da, eta bideoak konpartitzeaz gain iruzkinak egin eta esportatzeko aukera ere emango dute, Prezin sareratutako informazio horren arabera betiere. IP telebista horretan sareratu nahi dituzte kronikak, elkarrizketak, erreportajeak eta publizitate kanpainen spotak.

Konpartitzeko aukera

Open Government honetan publikatutako elementu bakoitzak izango du aukera iruzkin bat egiteko eta aldeko zein kontrako botoa emateko, eta horrez gain, honakoetara bidaltzeko:

  • del.icio.us
  • Twitter
  • Facebook
  • Google
  • Myspace
  • Technorati
  • E-postaz bidaltzeko
  • Beste webgune batzuetatik linka jartzeko

Horrez gain, Jaurlaritzaren perfil instituzionala sortuko dute sare sozialetan: Facebook, Twitter, Tuenti, Flickr, Youtube, eta abar.

Proposamena atari irekia hasiera batean irekia.euskadi.net url-an egotea da, geroako euskadi.net atarian integratzeko. Etorkizunera begira erabiltzaileak segmentatu nahi dituzte informazio pertsonalizatua emateko.

Erantzunak

sapi
2009-09-23 : 13:51

Nik izena aldatuko nioke eta "Gobierno Vasco abiertoa" jarriko nioke.

Gari Araolaza
2009-09-23 : 14:30

Badirudi hasi direla kanal guztietan tokia erreserbatzen. Aurrera doa beraz proiektu hau.


Beste non gehiago?


Josu Mendicute
2009-09-23 : 14:40

Ba, denbora kontua izango dela suposatzen dut, baina igo dituzten lehen argazkiek copyright lizentzia dute!!


juan mari
2009-09-23 : 15:01

Ertzaintzaren artxiboak ere zabalik?

Sustatu
2009-09-23 : 19:23

Dagoeneko ezabatu egin dute Prezi webgunetik Irekia.euskadi.net proiektuaren berri ematen zuen aurkezpena.


Sustatura ere deitu dute Eusko Jaurlaritzatik, Prezin publikoki dokumentu hori agertu izana euren akatsa izan dela aitortuz, eta mesedez eskatuz irudiak saretik kentzeko, onartu gabeko diseinu baten zirriborroak besterik ez direlako.


Esan digutenez, euskal blogosferako eta inguru teknofiloetako aktoreekin ere proiektuaren inguruan informatu eta iritziak trukatzeko asmoa du Jaurlaritzak hurrengo asteetan. Irudiak saretik kenduta, komunikazio truke horri laguntzen badiogu, gaitzerdi.


Tira, guri iruditu zaigu aurkezpen horretan zeuden irudiek antza zutela Patxi Lopez agintera iritsi eta segituan inauguratu zuten webgunearekin, Gobiernodecambioeneuskadi.org izan zenarekin. Ekimen hark 24 ordu besterik ez zuen iraun sarean, haren ezarpena arauz kanpokoa izan zela salatu izan zen, eta Jaurlaritzak saretik kendu zuen. Baina webguneak orduan zuen itxurari pantaila-irudia atera genion, eta hemen duzue:



Argazkiak.org | Gobiernodecambioeneuskadi.org © cc-by-sa: sustatu


Erantzun

Twitter ikonoa  Facebook ikonoa  Sartu