Praka piratak
Praka piratak
ikaragarri gustatzen zaizkit, udan eurak dira aproposenak edonora
joateko. Luzeak izateko, laburrak dira; eta laburrak izateko luzeak.
Zera esan nahi dut, ni sekula ez nintzatekeela klasea ematera joango
praka motzetan (kontuz motz berbarekin!), nahiz eta kastuak eta
pudikoak izan, ez nintzateke gustura sentituko, ez nuke egoki jantzita
ikusiko neure burua. Baina, praka piratekin, ostera, bai.
Argazkiak.org | piratak © cc-by-sa: txargain
Edonorako balio dute: lanerako, paseatzeko, mendirako, hondartzara joateko, turismo egiteko....Kontuan izan hainbat sinagoga, meskita, eliza eta tenplutan sartzeko belaunak gutxienez estalita egon behar direla.
Umeak izanez gero ere, praktikoa da. Umea hazi egin dela eta iazko prakak labur geratu zaizkiola, *peskan*, baina gerrian ibiltzeko moduan dituela? Ederto, ebaki eta pirata bihurtu.
Baina dena ez da abantaila izango. Txikiak garenok kontuz ibili behar gara; izan ere, praka piratak luze geratzen bazaizkigu, desastrea dator: praka pirata luzeak? Zer da hori? Praka luzeak labur! Zelan izan liteke hori?
Gizonezko izanez gero, txikia eta biboteduna, adi piratak janzteko orduan. Asterix eman zenezake! Komikiko pertsonaia! Eta nork gura du komikiko pertsonaia izan?
Eta azken aholkua: laga galtzetinak etxean, ez dago-eta gauza zatarragorik; baita zapata itxiak ere, ikusiko duzu sandaliak erabiliz gero zure behatzek nola eskertuko dizuten freskura.
Hau guztiau kontatuta, gezurra dirudi aurten eta iazko udan niri gertatutakoa. Piraten bila ibili, eta topatu ez! Inon ere ez! Ez zeuden modan; hortaz, abantaila eta erosotasunaz ezin disfrutatu. Azkenean, oso-oso merke *merkadilloan* aurkitu nituen batzuk, zorionez. Baina modaren diktadura honek ia-ia bernak erakutsi ezinda utzi ninduen. Nirean piratak udako "armairu-hondoa" dira. Inork imajina lezake bakeroak (jeans-ak) erosi nahi izatea eta ez topatzea modan ez daudelako? Ez, ezta. Bada, niri hori pasatu zitzaidan.
Diseinatzaileok, jendearendako diseinatu, eta izan praktikoagoak!!
Erantzunak
"Alakrana" atunontzia dela-eta, apropos asko ekarri duzue kontu hau. Indonesian gizonezkoak gona jantzita doazela, egokia iruditzen zait "praka piratak" bereiztea, "gona pirata" edo "sotana pirata" balizkoetatik bereizteko, adibidez.
Ai, ama! Hanka sartu dut, ezta? Pirata-prakez ari zarete eta ez naiz konturatu orain arte... Hau lotsa...! Barkatu, barkatu.
Gure aita, berriz, sutu egiten da praka piratez jantzita ikusten gaituenean. Nonbait beretzat atsegina ez den haurtzaroko pasadizo bat ekartzen dio gogora: hamaika anai-arrebako familian, arropak batetik bestera pasa ohi ziren txikiak geratzen zihoazen neurrian. Gure aitari, gazteenatakoa izaki, beti zegokion beste senide baten prakak hartzea eta handik konponketa, hemendik adabakia, beti prakak behar baino motzagoak egokitzen omen zitzaizkion. Hala, eskolara bidean, baserri baten paretik pasatzean, gizon ppppiiiiii (ez dut erreproduzituko berak aipatzen duen berba gordina) batek iseka egin ohi zion "hara, oaiñ e arreban baten prakak jantzita hua hi" esanez. Eta, noski, gure aitak ezin eraman haren burla. Hori ekartzen dio gogora eta ez ditu begibistan ikusi nahi praka piratak, ohitzen ari bada ere.
Horratx, zer ekarri didan gogora zeure aipamenak.
Segi bizkor!