Giraldillen 10. urteurrenean, aldarrikapen ekintza Berlinen
Euskal Herriko eta beste toki batzuetako ekintzaile talde batek aldarrikapen ekintza baketsua egin zuten joan den larunbatean Berlinen, munduko atletismo txapelketaren inaugurazioan, bakearen aldeko pankartak publiko eginez Olympiastadion-eko ageriko lekuetan.
Mugarik Gabeko Ekintzaileak izenarekin webgune eleanitza ireki eta sarean azaldu dute egindakoa. Euskal Herrian eta Mendebaldeko Saharan bakea eta konponketa aldarrikatu nahi izan zuten.
Argazki sorta bat ere jarri dute Flickr-en.
Ekintzak duela 10 urte justu Sevillan izandako atletismoko mundu txapelketaren inaugurazioa dakar gogora. Euskal presoen sakabanaketaren kontrako ekintza baketsua izan zen Giraldilla faltsuak estadioan infiltratu zirenekoa. 1999ko abuztuaren 20an izan zen hura. Ekintza haren eragina azaldu zuen duela urte batzuk Iñigo Fernandez Ostolaza marketin adituak.
Giraldillen kontua ezker abertzaleak inoiz egin duen aldarrikapen eraginkorrena izan zen. Asko izan ziren ekintza horrekin poztu zirenak, eta begi onez ikusi zutenak (eta ez bakarrik abertzaleak).
Ni adibidez oso leku bitxian bizi nuen larunbat hori: El Correo-ko egoitzan, eta bertako kazetari asko ere poztu ziren hori ikusterakoan (gogoratu treguan geundela, eta esperantzaz beteak geundela denok). Barre algarak entzun ziren, eta "estos cabrones, se la han metido doblada" entzun ere.
Borroka armatua alde batera utzita, ezker abertzaleak bide horretatik jarraituz gero (hau da, ekintza mediatiko, nazioartean gure egoera ezagutarazteko eta Espainiako gobernua erridikuluan uzteko. Borroka mediatiko eta inteligentea, XXI mendeko herramintak erabilita), asko izango ginateke berekin bat egingo genukeenak.
Giraldillak dira gure etorkizunaren metaforarik hoberena. Hedabideak mundu mailan modu inteligentean erabiltzeko adibide nabarmenena. Espainiar gobernuaren porrota sekulakoa izan zen, gogoan izan denek uste zutela 2004ko Eurokopa Espainiak antolatuko zuela, eta ekintza horren ondorioz Portugaleri eman ziotela (inolaz ere espero ez zen herria). Imaginatu zenbat diru galdu zen ekintza xume batekin.
Borroka armatua ez da bide bakarra. Giraldillak dira bide bakarra.