Patxi Lopezek aurrekontu murrizketa iragarri du EITBrentzat

EITBren aurtengo aurrekontua 203,2 milioi eurokoa da. Jaurlaritzaren finantziazio zuzena %76,23 da, baina gero beste zerbitzu batzuk kontratatuz diru gehiago bideratzen dute. Konparatzen aldera, RTVEren autofinanziazioa handiagoa da, %50. Baina hori ere aldatuko da, datorren urtetik aurrera RTVEk ez baitu publizitaterik izango. Babesletzak bai, baina iragarkirik ez.

ETB-1en aurrekontua igotzeko iragarpena

Igandean Alberto Surio EITBren zuzendaria elkarrizketatu zuen Berriak. Hau esan zuen Suriok elkarrizketa hartan:

ETB1i kalitate eta indar handiagoa eman nahi diogu, eta aurrekontu publiko gehiago lortu.

Patxi Lopezek Euskara Askatasunez ekimena aurkeztu zuenean, honako beste hau bota zuen: EITB eraberritzea informazio-zerbitzu publiko anitz eta demokratikoa, eta kalitateko eduki kulturalekin, eskaintze aldera. ETB-1en moldeak, edukiak eta aurrekontua aztertzea kultura euskaldun moderno eta askotarikoa garatzeko tresna baliagarri eta eraginkorra izan dadin.

EITBren aurrekontu orokorra jeitsiko dute, eta ETB1ena igo; edo bertan behera utziko dute proposamena? Ikustear dago nondik argalduko diren aurrekontuak.

Langileen egoera

LAB sindikatuak mehatxuak eta kaleratzeak salatu ditu ekainean. Sindikatu honek lehenago ere salatu izan du EITBk subkontratak sortzen dituela "kontrola ekidin eta soldatetan aurrezteko". EITBren zuzendaritzan egondako aldaketekin ez dago argi subkontrata hauek jarraituko duten. Antzeko egoera batean (EITBren hitzarmenetik kanpo) daude langileen %37.