Hildako bat gaurko entzierroan
Aurtengo entzierrorik arriskutsuena bizi izan dugu gaur goizean. "Capuchino" izeneko zezena atzean geratu eta batera eta bestera jo du zenbait minutuz. Gutxienez lau lagun zauritu ditu adarkadaz, eta horietako bat ordubete beranduago hil da Nafarroako Hospitalean. Azken 30 urteotan hil den laugarren korrikalaria da gaurkoa.
Oso entzierro arriskutsua gaur goizekoa. Ibilbide osoan izan da arriskutsua, baina batez ere "Capuchino" zezena Telefonicako inguruan atzean geratu denean. Plazarako bidea baino, atzeraka egin du behin eta berriro, tarte horretan hainbat lagun zaurituz.
Lau korrikalari adarkadaz zauritu ditu eta horietako bat, lepoan zauritu ondoren, ordubetera hil da Nafarroako Hospitalean.
Hildako horretaz gain, beste hiru zauritu larri ere izan dira, bata Mercaderes kalean (sabelean adarkatuta) eta beste bi Telefonican (izterrean adarkatuta).
Azken urteotako laugarren hildakoa.
Azken 30 urteotan beste hiru hildako ere izan dira San Ferminetako entzierroetan. 1980an eta 1995ean bi iparramerikar hil ziren, eta 2003. urtean korrikalari nafar bat.
Erantzunak
Une honetan Sanfermin.com webguneko portadan, zezenak mutil hau hil duen unea ikusten da.
Ez da harrapaketa bortitz bat. Ez da gehiegi ikusten. Istant bateko ukitu bat adarrarekin lepoan, horixe izan da dena.
Zezen horrek hainbat lagun jo eta airean erabili ditu gaur, indar handiagoz, denbora luzeagoan. Inprudentzia handiagoarekin ibili diren lasterkalariak ere hainbat izango ziren. Baina nahikoa izan da une hori, gizon hau hiltzeko.
Partikular batek grabaturiko bideoa dela dirudi.
Familiakoen atzetik segika ibili dira, eta albistea jakiten zuten unea eman dute. Ez dakit zein izango zan, arreba,ama... Ez dute gaztearen galera gainditu beharko bakarrik, beren burua mundu guztiaren aurrean beren bizitzako momenturik txarrenean erakutsi izana ere bai.
Lotsagarria da interneteko egunkari batzuk egiten ari direna: hil den mutilaren aurpegia erakusten dute, oraindik mutila nor den identifikatu gabe dagoenean (diario Vasco, El Mundo..) Familiakoak prentsa bidez enteratzeko moduan daude...benetan lotsagarria eta egunkari batzuen aldetik errespetu falta itzela!!!