Nacho Escolarrek beste hedabide bat sortuko du Espainiako panorama digitalean

Hemen ageri da bideo batean albistea ematen Nachon Escolar.

Nacho Escolarrek urteak daramatza arrakasta handiko blog batekin. Politika eta kulturaz tratatzen du hor, azken aldi honetan goi-politika edo, Madrilgo PP eta PSOEren arteko nahasmenduak batik bat (lehenago, blog eklektikoagoa zen). Publico egunkaria irten zenean (Mediapro hedabide taldera lotua) haren zuzendari izendatu zuten, baina duela hilabete batzuk kargutik kendu zuten. Bideoan oso azaletik ematen du ElDiario.es horren berri, izena ere badaezpadakoa dela. Teknologian ari direla batik bat dio Escolarrek, zehazki bere anaiarekin sortu omen duen enpresa batetik abiatuta. Juan Varela adituak dio bere blogean ADN.es webgune frustratuaren talde eta teknologiarekin arituko dela.

Munduan eta Espainian Internet hutseko hedabideak modan daudela dirudi, beste euskarri batzuetako hedabideekin lotura zuzenik ez dutenak edo, egunkari paperezkoen bertsio digitalak ez direnak. Espainian, ezagunenak dira:

• Libertad Digital, eskuin muturrekoa eta honezkero beteranoa, ez agian beste hedabide-konexio batzuetatik guztiz librea, Federico Jimenez Losanstos kazetaria baita zuzendaria.
• Soitu.es, Gumersindo Lafuentek zuzendua, BBVA bankuaren babesarekin batik bat.
• LaInformacion.com irten berria, Dixired edo Diximedia izeneko ekimenak bultzatua. Anbizio eta diru handiko proiektua omen. Honen atzean dagoen pertsona Mario Tascon da.

Garai batean, Espainiako Interneteko informazioaren borrokan izar Tascon eta Lafuente izan ziren, lehena ElPais.es zuzentzen eta besteak ElMundo.es.