Volgako zein Batelari zara zu?
Facebook-en ohikoak bihurtu dira denbora galtzeko mila txorakeria biral. Adibidez, quiz edo galdetegi horiek, pertsonaia multzo batean zurekin bat egiten duena zein den asmatzeko. Zein da zure pertsonalitatearekin bat egiten duen komikietako super-heroia? Zein pertsonaia historiko? Farandulako zein pertsonaia zara? Volgako Batelariek, beste zereginik ez eta, ezagutzen dugun era honetako euskarazko lehen galdetegia egin dute.
Argazkiak.org | Iban Zaldua facebook-en © cc-by-sa: sustatu
Iban Zalduak ere igaro du testa, eta emaitza argia da, bera Iban Zaldua da.
Zalduaren beste quiz batean ikusteko... Spidermanen pertsonalitatea dagokio berari. Iban Zaldua da Volgako Batelarietako bat, literatura bloga daukate berarekin batera beste hauek ere: Juanjo Olasagarre, Angel Erro, Uxue Apaolaza, Rikardo Arregi Diaz de Heredia, eta Ibon Egaña.
Argazkiak.org | Iban Zaldua Facebook-en © cc-by-sa: sustatu
Sustatu ere ausartu da testarekin, eta Juanjo Olasagarre da Facebook-eko gure pseudo-pertsonalitateari dagokion idazle egokia.
Argazkiak.org | Sustatuk Volgako Batelarien quiz-a bete du © cc-by-sa: sustatu
Facebook-en bazabiltza, igaro orri honetatik eta egin testa. Bide batez, Sustatu Adiskidea bertan duzu, lagunkoi.
Argazkiak.org | Volgako Batelarien galdetegia Facebooken © cc-by-sa: sustatu
Oharra: Test hauek, eta oro har Facebook, prokrastrinaziorako tresna ezin aproposagoak dira. Ezaguna da laneko produktibitatea jaisten dutela. Alegia, gauza inportanteak geroko uzteko primerakoak, inozokerietan denbora galtzen duzun bitartean. Neurrian ibili eta zintzo portatu.
Estilo honetako beste bat aurkitu dugu Facebook-en: Goenkaleko zein pertsonaia zara zu?