Eredu berritzaile batekin abiatu da Behe Bidasoako Hitza proiektua
Proiektu berritzailea jarriko du martxan laster Behe Bidasoako Komunikabideak enpresak: Behe Bidasoako Hitza. Egunero hainbatetan berritzen den webguneak, egunero interneten flash edo pdf formatuetan eskuragarri izango den e-gunkari batek eta astero banatuko den papereko edizioak osatzen dute proiektua.
Behe Bidasoako Hitza-ren 0 zenbakia asteburuan banatu dute, eta era horretan eskualde hartan (Biriatu, Hendaia, Hondarribia, Irun eta Pausu) zegoen hutsunea betetzeko aurreneko pausoa eman da.
Bertako Hedabideak (EKT), Pausu Media (Antxeta Irratia), Irun Iruten euskara elkartea, Hondarribiko Bagartian euskara elkartea eta Hendaiako euskalgintza daude, besteak beste, proiektuaren sustatzaileen artean. Aurreneko zenbakia martxoaren 27an argitaratuko da. Eskualdearen beraren beharretara eta garai berrietara egokitutako proiektua izango da, berritzailea, eta, hala, hiru adar izango ditu Behe Bidasoako Komunikabideak SM-k gidatuko duen proiektuak:
- Egunero hainbat aldiz berritzen den bidasoamedia.info digitala argitaratuko du, gaur egun eskaintzen dituen hainbat eta hainbat zerbitzurekin (bideoak, iritzien txokoa, audio artxiboa....).
- www.behebidasoakohitza.info helbidean, egunero astelehenetik ostiralera Behe Bidasoako Hitza e-gunkaria jarriko da irakurgai flash formatuan, eta pdf formatuan jeitsi eta inprimatu ahal izango du edonork.
- Ostiraletan Behe Bidasoako Hitza banatuko da paperean, hasiera batean 16 orrialdeko produktua, baina helburua 32 orrialdera arteko produktua egitea da.
Erantzun
Sartu