DantzanTV ekarri digute errege majoek

Espainia aldean badago dantzari eta dantzazaleen plataforma bat dantzari buruzko programa bat eskatzen diona TVEri. "Mira quien baila" eta "Fama" bezalakoak bai, baina dantza sentsibilitatez eta gustoz landuko duen saiorik ez dagoela salatzen dute. Ez dakit ezer lortuko duten, baina gaur egun telebista gehienen joerak ikusita pentsatu genuen hobe genuela geuk egitea nahi dugun telebista inoren zain egon baino.

Orain urtebete pasa blogean sarrera bat idatzi nuen "Dantza, telebista eta Internet: 2008an bai ala bai" izenburupean. Bertan esaten nuen "Ea dantzan.com-en bideoa normaltasunez integratu eta dantzanTV balizko baterantz urratsak ematen ditugun".

Olentzerok ia-ia ekarri zigun oparia baina azkenean erregeak izan dira, 2009arekin batera bideoa dantzan-era normaltasunez ekarri digutenak. Momentuz produkzio propioa oso xumea izango da, telebista medio astuna eta garestia baita, baina gutxienez noizean behin dantzei buruz hitzegiteaz gain dantzak ikusteko aukera izango dugu dantzan.com-en.