Saria Iparrorratza orientazio zerbitzuari
UEUren Unibertsitatea.net atariko Iparrorratza zerbitzuak Ikasketa eta Lanbide Orientabiderako 1. Educaweb saria jaso du. Educaweb Interneteko atariak hamar urteko eskarmentua du hezkuntza eta lan arloko orientazioan, eta Espainiako estatuan erreferente bihurtzea lortu du.
Bere hamargarren urteurrena ospatzeko, Educawebek saria eman nahi izan die orientazio zerbitzuak eskaintzen dituzten talde eta banakakoei, eta Iparrorratza UEUren orientzazio-zerbitzuak finalista saria jaso du. Lehen, bigarren eta hirugarren postuak definitzea zail egin zaie lehiaketako epai mahai-kideei, eta azkenik, lehen saria eta finalisten sariak eman dituzte.
Iparrorratza UEU-ren Unibertsitatea.net atariko zerbitzu bat da. Bertan unibertsitate ikasketen inguruko galderak egiten dira eta orientazio talde batek, hainbat informazio iturri kontsultatu eta gero, epe motzean erantzuten die zalantza horiei.
Erantzunak
Eskerrik asko Mairu. Guretzat benetan oso pozgarria izan da egindako lanari Educaweb-ek emandako errekonozimendua. Ikasketa- eta lanbide-orientabiderako I. Educaweb sariketan erakundeen alorrean aurkeztu genuen Iparrorratza eta 25 bat lanetatik lehenengo hiruren artean geratu da. Sariketa irabazi ez dugun arren Iparrorratza finalista geratu da!
Unibertsitatea.net atariaren Iparrorratza orientazio zerbitzua, aurtengo otsailean jarri dugu martxan eta bakarra da bere alorrean. Unibertsitate alorreko zalantzen gaineko informazio inpartziala eta pertsonalizatua eskaintzen du, euskaraz, on-line eta doan. Hainbat gairi buruzko ikasketa-orientazioa eskaintzen da, besteak beste: titulazio jakin bat lortzeko lekuak, gradu eta graduondoko titulazioei buruzko informazioa, batxilergoko edo lanbide-heziketako ikasketen eta unibertsitatekoen arteko erlazioa, unibertsitatean hasteko irizpideak, matrikulazio-prozesua, curriculum-lerroen hautaketari buruzko orientabidea, lan-munduaren eta ikasketen arteko egoera...
Jadanik 100 galderatik gora jaso ditugu eta 71 dituzu web gunean argitaratuta kontsultatu nahi izanez gero. Hala ere, galdera egitea ere, benetan erraza da, Galdera egin botoian klik egin, bertako galdetegi laburra bete eta hiru laneguneko epean izango duzu erantzuna.
Zorionak, pozten naiz euskarazko zerbitzu bat sariduna suertatzea.
Zein sari irabazi duzue? Lehena, finalistak izan zarete? Zein izan da saria?
Bestalde, unibertsitateko ikasketen inguruko galderak egin ahal dira soilik? Edozein galdera bideratu daiteke? (Egoitzak, bekak...)