Euskaltzaindiaren nazioarteko biltzarra, Pirinioetako hizkuntzak
Euskaltzaindiaren Nazioarteko XVI. Biltzarra Iruñean izango da urriaren 6tik 10era, Baluarte Batzar Jauregi eta Auditoriumean. Biltzarraren gaia izango da: Pirinioetako hizkuntzak: lehena eta oraina. Entzule gisa parte hartzea librea da, baina azkar ibili, hemen izena eman behar da urriaren 2a baino lehen.
Kartelean, Pirinioetako lau hizkuntza ageri dira: euskara, aragoiera, okzitaniera eta katalanera.
Egitaraua hemen duzue. Urriaren 7a, historia eta dialektologiari buruzko eguna, bi hitzaldi indartsurekin hasiko da. Joseba Lakarrak Aitzin euskara izeneko hitzaldia emango du, eta Joakin Gorrotxategik Euskara Zaharra izenburuduna. Gorrotxategi eta Lakarra, biak kritiko eta sinesgogor azaldu izan dira Veleiako ustezko euskararen aztarna zahar horien inguruan.
Biltzarra Euskaltzaindiaren 90. urteurrenaren lehen ospakizuna izango da. Izan ere, 1918an abiatu zen akademia sortzeko prozesua, eta 1919ko urrian eratu zen ofizialki Euskaltzaindia.
Euskaltzaindiaren nazioarteko biltzarraren egoitzan, Baluarten, webgunea daukate eta egutegiaren euskarazko bertsioak honela erakusten du hilabetea: lokalizazio arazo bat seguruenik.