Lawrence Lessig eta Remix Euskal Herrian
Lawrence Lessig, Creative Commons lizentzien sortzailea, Euskal Herrian izango da bere hurrengo liburua aurkezten: Remix. Hitzaldia emango du Araba Enpresa Digitala ekimenak gonbidatuta, Miñaoko parke teknologikoan, urriaren 17an, 13.00etan.
Zera aurkeztuko du Lessigek: Remix: Ekonomia Hibridoan Arte eta Merkataritza oparoa eraikitzea. Oraingoz argitaratu gabe dago liburua, beraz, aurrerapen polita dastatzeko aukera dugu.
Edukien industriak industria orokorrari egileen eskubideak arautzean muturreko neurrietara jotzea merkataritza eta ekonomiaren hazkuntzarako ona dela pentsarazi dio, baina hori gezurra da. Hitzaldi honetan, Lessig Irakasleak muturreko jabetza intelektualarekin bukatuko bagenu, geure kulturak eta industriak gara lezaketen sormenezko etorkizun oparoa deskribatuko du.
Lawrence Lessig-ek unibertsitateko Internet eta Gizarterako Gunea sortu zuen, baita Creative Commons ekimena ere. Stanford, Harvard eta Chicagoko Unibertsitateeko Zuzenbide Irakaslea eta abokatua da eta zuzenbide informatikoan aditua da. Pensilvaniako Unibertsitatean, Trinity College-en (Cambridge) eta Yale Unibertsitatean ikasi zuen.
Gaur egun Creative Commonsen presidentea da, Electronic Frontier Foundationeko Kontseiluko kidea eta 2005ean sortutako Software Freedom Law Centerreko Zuzendaritza Batzordeko kide da.
Informazio gehiago eta izena emateko aukera hemen. Izen-ematea doan da.
Duela hilabete gorde nuen liburu honen erreferentzia Deliciousen, Lessig Euskal Herrira etorriko zela jakin baino lehen. Liburuaren hiru gaiak laburtzen zituen erreseina horrek:
(1) that this war on our kids has got to stop,
(2) that we need to celebrate (and support) the rebirth of a remix culture, and
(3) that a new form of business (what I call the "hybrid") will flourish as we better enable this remix creativity.)
Lehen puntu horren idazkerak arreta deitu zidan: Gure seme-alaben kontrako gerra gelditu behar dugu. Bai. Nola animatu gure haurrak sortzera, kulturaz blai gozatzera, munduko adierazpen originalenak edo berrienak gure sustrai propioekin edo irudimenarekin nahastera? Nola lor haurrek Hayao Miyazakiren edo Pixar estudioen fantasiak euskaraz dasta ditzaten?
Propietate intelektualaren mamuak, hori guztia delitu bihurtzen du. "Pirateria", diote batzuek. Gerrako lengoaia. Kulturaren eta sorkuntzaren kontrako gerra bere termino zehatzetan definitu, eta haren gainetik jauzi egin eta aurrera egiteko unea dela uste dut.
Uste dut Lessig entzutera joango naizela.