Tokiko hedabideen lan poltsa
Tokiko hedabideon lana errazteko asmoz, haien langile beharrei erantzuteko lan poltsa eratu du Topagunearen Hedabide Sailak. Sarritan aldi baterako zein epe luzerako langileak behar izaten dira hedabideotan, haien jardueraren esparru guztietan: kazetaritzan, noski, baina baita diseinuan, maketazioan, argazkilaritzan, administrazioan, komertzial lanetan, publizitate alorrean, ikus-entzunezkoen alor teknikoan...
Topagunearen bazkideen artean 42 tokiko hedabide kudeatzen dituzte: 35 aldizkari, bost irrati eta bi telebista. Denak ere hurbileko informazioaren esparruan mugitzen dira, eskualdeko edo herriko albisteak landuz. Gertutasunak aukera aparta eskaintzen du irakurle / ikus-entzulearekiko zuzeneko harremana izateko eta, batez ere, zuzen-zuzeneko kazetaritza egiteko.
Hedabide handietan hain ohikoa den prentsa ohar eta prentsaurreko bidezko funtzionamendua hutsaren hurrengoa da tokikoetan, eta kazetariak etengabe aritu behar du albistearen bila: jendearekin hitz egin, bateko eta besteko iritziak jaso eta kontrastatu... primerako eskola direla esan daiteke, beraz, benetako kazetari sena dutenentzat.
Lan-poltsan izena ematea oso erraza da:
- Jaitsi ordenagailura Topagunearen webgunean dagoen izena emateko fitxa eta zure datuekin bete.
- Fitxarekin batera, bidali kurrikuluma bertan agertzen den posta elektronikora. Jasotzen dugunean, konfirmazio e-mail bat jasoko duzu eman diguzun helbidean
- Listo! Datuak lan poltsa osatzeko propio sortutako datu-base batean sartuko dira, eta bi urtez mantenduko dira bertan. Hedabideren batek langile beharra duela adierazten duenean, behar horiek lan poltsako fitxekin konparatu eta bat datozen hautagaien fitxak helaraziko zaizkio hedabideari, aukeraketa egin dezan.
- Urte biak pasata, aukera emango dugu fitxa lan-poltsatik ezabatu edo, nahi izanez gero, eguneratu eta beste bi urtez mantentzeko.
Erantzun
Sartu