Soft librea erabiltzeko bideo-laguntza euskaraz

Lanari buruzko informazioa eta aurkibidea hemen duzu, eta EHUko EHUX distribuzioaren webgunean, bideoak deskargarako. Ogg Vorbis formatuan daude, eta hortaz, Mac OS X edo Windows sistema eragileetan, VLC jogailua (doakoa, librea) beharko duzu ikusteko. Creative Commons lizentzia libre batekin banatuta daude lanak, eta hortaz, bideoak partekatzeko tokiren batera igo daitezke: ez litzateke ideia txarra. DVD bidez grabaketak banatzeko gomendioa ere egiten du Euskalgnuk, ez banda gehiegi kontsumiarazteko EHUri.

Gnome mahaigainekoari buruzko lezioak dira, eta baita programa batzuen gainekoak: InkScape, OpenOfficeren adarrak (Calc da Excelen alternatiba, eta Impress erabili daiteke Powerpoint-aren ordez), Gimp (Photoshop ez erabiltzeko), inprimgailuaren konfigurazioa... Gnome mahaigainekoa eta programa hauek GNU/Linux banaketa ohikoenean, Ubuntu delakoan, aurkituko dituzu.

Bideoak bereizmen handian grabatu dira: 1280x720 pixel. Eta ireki ditugun pare batean, Dooteo bera, Euskalgnu-ko partaide ezaguna, ageri da hizlari, oso txukun urratsez urrats gauzak azaltzen. Dooteoren enpresa, Zundan, agertzen da halaber bideoetako kredituetan.

Gipuzkoako Foru Aldundiaren dirulaguntzarekin jarri ditu lanak eskuragarri Interneten EuskalGNUk.