Kerobia, disko berria sarean deskargatzeko moduan
Kerobia pop-rock talde nafarrak sarean jarri du deskargarako libre bere disko berria: Materia Organikoa eta gainerakoak. Diskoa autoprodukzioa da, zirgilu propioarekin eta SGAE-tik kanpo kaleratu da.
Diskoari dedikaturiko webgune bat jarri dute martxan, eta bertan duzu deskargetarako atala non Materia organikoa aurkituko duzun. Bideoklip bat ere bai, gainera.
Kerobiak komunikatu baten bidez azaldu du jokaldia:
SGAEtik geure burua bajan eman dugu. Proiektu berri honen filosofiarekin bat ez datorrelako eta beraiek betetzen duten funtzioarekin eta lanarekin bat ez datozelako, gure aurreko diskoen etekinei uko egin diogu eta hemendik aurrera SGAEtik kanpo lan egiteko asmoa daukagu.
Era berean, gure musika eta autoprodukzioa izanik, libreki erreproduzitzeko aukera eman nahi diogu entzule guztiei, beraz disko osoa, kalitate onean, audio, irudi eta datu guztiekin libreki jendeak web orrialdetik hartu dezan utziko dugu. Gure lana edonork dohainik jeisteko aukera dagoen arren, bakoitzak gure lana baloratu eta gure proiektu honetan laguntzeko dirua aportatzeko aukera izango du, proiektu hau bere osotasunean burutzeko aukera emateko eta hori aurrera eramateko medio nahikoak ahalbideratzeko.
Honekin batera, ohi den bezela, gure lana dendetan ere erosteko aukera izango da GOR disketxeak banaketa egingo duelarik.
Diru-aportazio boluntarioa eskatzen dute beraz (PayPal bidez), baina ez da derrigorra ematea, 5 kantu eta diskoko azalen irudiak 56 Mb-ko pakete batean jaisten ahal dituzu.
Bide batez, bloga ere hasi dute Kerobiakoek. Animo!
Erantzunak
irratia.com egiten dugunok arretaz jarraitu dugu aspaldion Kerobia taldearen urrats bakoitza. Bere webgunea jarraituz, bideoko kantua entzunez, komunikatua aipatu eta azkenean taldea ere elkarrizketatu genuen, diskoa kaleratu baino egun batzuk lehenago.
Egia esan, oso interesgarria egin zitzaigun eurekaz berba egitea, musikaren munduan oso irudi heldua eman digutelako.
Saio berean Ruper Ordorikarekin ere aritu ginen, eta Iruñeatik saioa entzuten izan genuen hurrengo gonbidatuak, hala ere Ruperrek aipatutakoak modu interaktibo batean aipatu zituen, elkarrizketa bera aberastuz.
Saioa entzun gura baduzu, klik egin, jendeari gustatu zaio, twitter bidez ere asko aipatu da/dugu Kerobia.
Nire partetik, zorionak Kerobiari SGAE albo batera uzteagatik.
Edukiak kopiatu ahal izateko moduan zabaltzeari dagokionez, kostata baina azkenean aurkitu dut zein lizentzia erabili duten: Creative Commons Aitortu-EzKomertziala-PartekatuBerdin. Tontokeria bat dirudi baina oso garrantzitsua da edozein lan zabaltzen dugunean copyright oharrean zeintzu askatasun ematen ditugun argi eta garbi esatea, bestela bai egileak bai irakurle/musikazale/erabiltzaileak arazoetan sartu bait daitezke. Beraz, betiko copyright-a erabiltzen ez dugunean ez ahaztu lizentzia bat argi erakusten!
Honelako erabaki bat Kerobia bezalako talde haundiak hartzen dituzte. Euskal Herrian dagoen talde berritzaile haundienetako bat dudarik gabe! bere musika ibilbidean sortzaile ausartak direla erakutsi dutelako, eta pasioz betetako lana, bikaina delako, ZORIONAK!
Radiohead talde haundiak ere bere azken lana dohain eskeini zuen, jakintza librea sustatuz!
Zuzenekoan ikusiko zaiztuztet mutilak!
Seguru nago sarean doan jartzeak onurak baino ez dizkiola ekarriko. SGAEtik irten eta dena interneten jartzeak Kerobiazale egin nau.