"Gipuzkoa 2.0" euskarazko kultura edukiak sustatzeko programa

Gipuzkoa.net-ek zabaldu duenez, Diputatuen Kontseiluak 441.200 euro onartu ditu Gipuzkoa 2.0 programarako

Kultura eta Euskara Departamentuak Gipuzkoa 2.0 deritzan programa onartu zuen, eta bi lerro nagusitan bideratuko dira:

• Azterketak, lan monografikoak eta antzekoak editatzea edo argitaratzea.

Horiek Gipuzkoarako interesa duten kultura gaiei buruzkoak, liburu edo disko euskarrian edo jendartean hedatzeko balio duen besteren batean eginak, eta irabazi asmorik gabekoak izan behar dute. Horrelakoetarako diru laguntzetan 80.000 euro emango dira.

• Euskarazko edukiak informazio teknologien bidez hedatzeko proiektuetarako diru laguntzetan 361.200 euro emango dira.

Lerro honetan kokatzen diren proiektuen edukiak honelakoak izan behar dute:

1. Honako gaiei buruzko edukietatik abiaturik, webguneak sortu, eguneratu edo/eta hobetzeko proiektuak egitea: euskara, musika, antzerkia, dantza, literatura, arte plastikoak, ikus-entzunezkoak, kultura tradizionala, gaur egungo gaiei buruzko jakintza eta gogoeta arloa, eta antzekoak, ondare historiko-artistiko, etnografiko, dokumental edo museistikoa, betiere Gipuzkoarentzat interesgarriak gertatzen diren heinean.
2. Komunitate lokalei loturiko proiektuak sortu edo garatzea sarean.
3. Interneteko edukiak lokalizatu edo internazionalizatzea, jarduera esparru honetan interesgarriak badira.
4. Sare soziala garatzen laguntzen duten proiektuak egitea (software soziala, lankidetzarako tresnak eta gisakoak).

Aurtengo diru laguntzetarako eskaerak aurkezteko epea 2008ko maiatzaren 15ean bukatuko da.

Gipuzkoako Euskara Zuzendaritza Nagusiaren diru laguntzaei buruzko informazioa www.gipuzkoaeuskara.net webgunean.