Kosmodisearako aukeratutako ideiak
Migrazioak, energiaren erabilpena, baserriko bizitza, Kosmosoc eta bakarrik idazten duen boligrafoa. Gipuzkoan Kultura ekintzailearen balioak sustatzeko Kosmodisea ekimenak ideia horien inguruan egingo du lan.
Aurkeztutako 231 proposamenen artean aukeratu dituztenak Txingudi Ikastolak, Ikasbide Ikastolak, Elgoibar Ikastolak, Nazaret Zentroak eta Tolosaldea Goi-mailako LHIk egin dituzte.
Unibertsitatetik kanpoko hezkuntza-esparruan kultura ekintzailea eta digitalaren balioak sustatzen dituen Gipuzkoako Foru Aldundiaren Berrikuntzarako eta Jakintzaren Gizarterako Departamentuaren ekimena den Kosmodisearen 2007-2008 edizioan amaitu da Ideia-jasaren fasea, Gipuzkoa Ekintzailea webgunean aditzera eman denez.
Bertatik aukeratzen dira programan landuko dituzten ideiak.
Hona hemen, hezkuntza-ziklotan banatuta, ideia irabazleak:
- Lehen hezkuntza (1., 2. eta 3. mailak). Neo sistema: Migrazioa (Txingudi Ikastola)
- Lehen hezkuntza (4., 5. eta 6. mailak). Fisio sistema: Energiaren erabilpena (Ikasbide Ikastola)
- Derrigorrezko Bigarren Hezkuntza. Glos sistema: Baserriko bizitza (Elgoibar Ikastola)
- Batxilergoa. Logo sistema: Kosmosoc, gune desberdin bat (Nazaret Zentroa)
- Heziketa Zikloak. Tekhne sistema: Bakarrik idazten duen boligrafoa (Tolosaldea Goi-mailako LHI).
Une honetan, Kosmodisearen 2007-2008 edizioan 34 ikastetxe, 76 irakasle, 127 talde eta 1.037 ikasle ari dira parte hartzen.
Erantzun
Sartu