Teknologia albisteak

Zapiain, zoofilia, Txillardegi eta blogosfera

Luistxo Fernandez - Eibar.org

2007-11-22 : 11:11

Txillardegiri buruzko liburua idatzi du Markos Zapiainek, eta sarean dago testua osorik: Txillardegi eta Ziminoa. Atzo Donostian izan zen aurkezpena, eta Patxitraperok kronika idatzi du. Interneten dexente ikertu du filosofoak gero: Ziminoen urritasun horretaz Eibartarrak foroan galdetuta Leire Narbaiza animaliazaleak erantzun duenez, preseski, gizona eta primatea «hain igualak izanda, ez dabe zoofilixia danik konsiderauko».

Beste pasarte aukeratu batzuk, Susak argitaraturiko liburu honetatik:

Liburuxka hau eskasegia da halako handitasunen berri emateko, baina espazioa erlatiboa da eta Eli Laztangurenek, aldiz, egundoko bloga du ziminoen gainean: Kixmi.
Ikerketa eraman beharko genuke aldi berean zoofilia irrikaz hedatua eta zimino ugari luketen lurraldeetara, ez dago beste irtenbiderik. Eskainiko dute beharbada bekaren bat Jaurlaritzako Maitasun Sailean halakoak idazteko.
Patxitraperori laguntza eskatu diogu. Delinkuentzian amilduriko udaltzain eredugarri bat da, blogari epustuflante bezain zoofilo nekagaitz, hitzaren zentzu etimologikoan.
Imanol Trebiño liburuzainak hurbiltasun genetikoa eta fisikoa bereizi ditu: «Neri gertutasun kontua emoten desta. Zer dago gure kulturan gertuen? Ez genetikoki, fisikoki. Etxabereen artean ez da tximinoa sartzen, eta tximino bat lortzeko... zirku batean ez bada... zootan begittuta... Madrilen edo gertuen?».

Patxitraperok dioenez, Zapiainen hurrengo liburua zera izango da: Interneteko harreman birtualen abantaila kontaezinak, aurrez-aurreko benetakoen aldean. Glups!