Teknologia albisteak

Mahai-ingurua Bilbon, Sabino Arana gaitzat hartuta

xme - elkar

2007-11-19 : 11:11

Jurgi Kintana historialari gazteak euskaraz idatzitako Sabino Aranaren lehenengo biografia kaleratu duela-eta, aurkezpen gisako mahai-ingurua antolatu da azaroaren 20rako, arrastiriko 7etan, Euskaltzaindiaren egoitzan (Bilboko Plaza Barrian). Parte-hartzaileak, Joseba Agirreazkuenaga eta Mikel Aizpuru historialariak eta Josune Ariztondo EBBko kidea. Xabier Mendiguren Elizegi arituko da moderatzaile-lanetan. Entzun nahi duten guztientzat zabalik dago ekitaldia.

Euskal Herrian XX. mende osoan eragin handiena izan duen pertsonaia dugu, dudarik gabe, Sabino Arana: EAJren sortzailea, ikurrinaren asmatzailea, aberri zapalduaren kontzientziaren piztailea. Jesukristoren pare gurtzeraino goratu izan dute batzuek; Hitlerren mailan jartzeraino gaitzetsi bestetzue. Jurgi Kintanaren biografiak aukera ederra eskaintzen du pertsona bera eta haren ingurumaria ezagutzeko, modu zintzo eta kritikoan idatzirik.

Aranaren testuingurua, gaurkotasuna, itzal-argiak horrelako kontuak erabiliko dira mahai-inguruan, baita entzuleek proposatu nahi dituzten gaiak ere. Zuk ere bertaratu nahi baduzu, ongi etorri.