Hizketan.org - Zarauzko hizkera eta ahozko ondarea sarean

Zarauzko udalak deituriko beka bati esker, bost laguneko lantalde batek herriko ahozko ondarea bildu du azken urteotan. Zarautz Hizketan izenez bataiatu dute egitasmoa. Belen Maiz, Miren Zabaleta, Aintzane Agirrebeña, Asier Sarasua eta Fernando Muniozguren zena aritu dira lan horretan.

Azken 3 urteotan 50 elkarrizketa egin dituzte Zarautzen, gehien-gehienak 70 urtetik gorako herritarrei. Horrekin batera, orain dela 20 urte egindako beste 20 grabazio ere berreskuratu dituzte.

Proiektuaren asmoa bikoitza zen: herriko hizkera jasotzea eta Zarauzko ohitura, bizimodu eta historia biltzea, betiere protagonisten ahotan.

Proiektu horren emaitza izan dira, atzo aurkeztu ziren liburua, DVDa eta webgunea, hizketan.org. Webgune horretan bildu da proiektuan zehar jasotako informazio gehiena. Lekukoen eta elkarrizketen informazioa, jasotako materiala..., eta egindako elkarrizketen pasarte batzuk ikusi eta entzuteko aukera ere badago.

Adibidez:

• Hiztunen zerrenda
• Jasotako guztia gaika antolatuta
• Hiztun baten fitxa
• Pasarte baten fitxa, transkripzioa eta bideoa

Informazio gehiago

Egileetako batek, Asier Sarasuak, informazio gehiago eman du bere blogean, eta atzoko aurkezpeneko irudi batzuk utzi ditu Flickerren

Aurkezpenean erakutsitako azalpen-bideoa ere sarean dago: Zarautz Hizketan, aurkezpen-bideo.