Banoa bidaien txango batean ziren hildako sei turistak
Banoa bidaia agentziako bezeroak ziren gaur arratsaldean Yemenen hildako sei turistak. Bilbon eta Bartzelonan sukurtsalak dituen agentziak Europa Press-i baieztatu dionez. Ezkutuko Arabia izeneko ibilbidea egiten ari ziren, hango 18:30etan bonba auto baten leherketak harrapatu dituen turistak. Eurekin zegoen yemendar gidaria ere hil da leherketaren ondorioz. Eguneraketa asteartea: Hildakoen artean bi gipuzkoar daude, Mikel Essery Banoa agentziako langilea eta Donostiako bidaiari bat, Maddi Álvarez Calleja.
Erantzunak
Berriak argitaratu du jakin duela hildakoen artean Mikel Essery Banoa agentziako langilea dagoela.
Mikel Essery eta Banoako bere lankideek aurtengo denboraldirako bidaia proposamenak aurkeztu zituzten duela aste batzuk Donostian prentsaurrean. Prentsako albiste horretan behintzat ez da Yemengoa aipatzen.
Hildakoen artean bi gipuzkoar daude, informazio honen arabera: Mikel Essery Banoa agentziako langilea eta Donostiako bidaiari bat, Magie Álvarez Calleja.
Gainerako turista hilak Kataluniakoak dira, haietako bat Burgosen jaioa. Bidaiarien artean Euskal Herriko beste hiru emakume zeuden, bi Bizkaikoak eta bat Arabakoak. Maria Asuncion Vitorica arabarra zainketa berezietan omen dago zauritua, eta beste biek zauri arinak dituzte.
Arabako zauritu larriaz gain, EITB24ko zerrendaren arabera, zauritu bizkaitarrak hiru dira: Eva Maria de Mena,
Estibaliz Diez del Rio, eta Begoña Larrabeiti Meabe.
Maddi Alvarez da hildakoetako baten izena. Nondik atera da "Magie" hori?
Espainiatik noski!
Maddi entzun du Madrilgo mokordoren batek, ingelesezko "Maggie" zela imaginatu eta gaizki idatzi du. Sustatuzaleak adiago egon behar zineten horrekin, baina ulertzen dut albistea azkar ateratzea zela lehentasuna.
Dena den, badago zuzentzerik, ezta? Erabat alienaturik eman ez dezagun behintzat.
Mikel Essery ezaguna nuen, ez oso hurbilekoa, baina aspaldidanik elkarren ezaguera genuen. Aita ingelesa, uste dut, eta ama zarauztarra zituen.
Francoren garaian eta trantsizioan, EMKko kide ezaguna izan zen. Behin baino gehiagotan atxilotu zuen poliziak, nik dakidala.
Bidaia kontuetan hasi zelarik, Brasilen joan-etorri ugari egin zituen. Han ezagutu zuen bere emaztea; orain, Donostian bizi ziren, bi seme-alabekin batera. Egunkariren batean irakurri dut emazteagandik banandu berria zela...
Bidaiari izateaz gain, irakaslea zen lanbidez. Donostiako Egia auzoko eskolan urte asko egin ondoren, Intxaurrondo Hegoko herri eskolan zen ingeleseko irakasle eta ikasketa buru oraintxe.
Gizon jator, leun eta izaera onekoa, nik hala ezagutu dut behintzat.
Ajentzien arabera euskaldunak eta katalanak ziren erasotutako furgonetetan bidaiatzen zuten turistek. Hauekin batera bidaiatzen zuten bi yemeni, gutxienez, hil dira atentatuan.