Teknologia albisteak

Lizarrako Garean Euskaldunon Elkartea osatu da

GArean - Garean

2007-06-19 : 18:06

Lizarrako eta Estellerriko zenbait euskaldunek osatu dute elkarte hau, euskararen erabilpena sustatu eta bultzatzeko asmoz. Horretarako, euskal hiztunendako elkarguneak sortu nahi dituzte, euskaraz mintzatu eta komunikatzeko.

Hilabete batzuk pasa dira, elkarte honen sortzaileak harremanetan hasi zirenetik eta asmoa zena errealitate bilakatzen ari da. Izan ere, ekainaren 23an aurkeztuko dute ekimen batzuen bidez. Horrela, goizeko 11etan Lizarrako Kultur Etxean hiri honetako gizarte eragileei eta erakundeei Garean Euskaldunon Elkarte aurkeztu diete. Ekitaldi honen ondoren, goizeko 11,30etan, San Nikolas Plazan aurkezpen besta eginen dute; musikak lagunduta, elkartearen nondik norakoak azalduko dituzte eta hamaiketakoa egiteko aukera ezin hobea izanen dute bertaratuko direnek.

Aurkezpen besta bukatzeko, Lizarrako kaleetan zehar bi kalejira antolatu dituzte: bata, euskaraz abesteko Lizarra Kantuz izeneko ekimena eta bestea Batukada batek lagunduko duena. Bi kalejira hauek Santiago Plazan elkartu dira eta egun honetako egitarauari bukaera emateko, beste sorpresa batzuk prestatu dituzte antolatzaileek.

Aurkezpen egun hau pasa ondoren, Garean Euskaldunon Elkartea ekimen desberdinak antolatzen hasiko da eta horren berri zabalduko du.

Erantzunak

Gerardo Luzuriaga

2007-06-20 : 12:28

Esteierrikoa naizen aldetik interesgarria bezain pozgarria egin zait egindako ekimen berria jasotzea. Aurrerantzean espero dut era batean edo bestean elkarte berriaren alde zeredozer egitea. Zorionak eta segi aurrera.

Jose Felix Diaz de Tuesta

2007-06-20 : 17:44

Ni ere pozten naiz, ama Lizarra aldekoa dut eta. Aurrerantzean Garean elkartearekin harremanetan jarri eta lagundu ahal izatea espero dut.