Hamaika Bertuteren web orri berritua

2007ko urtarrilean jarri zen martxan Hamaika Bertute taldea eta, ordutik, 80 bat saio egin dituzte. Euskal Herriko bazter guztietako 45 bat bertsolarik osatzen dute talde autogestionatu hau. Helburuak, ugari: bertsoekin gozatzea eta gozaraztea, bertsolarien arteko harreman-sareak sortzea, harreman horiek proiektu berriak bideratzeko aprobetxatzea, baliabide ekonomiko urriak dituzten antolatzaileei bertso-saioak antolatzeko beste aukera bat ematea, plaza gutxi dauzkaten bertsolariei aukerak ematea, plazetan sarri aritu arren bertso-kide eta entzule diferenteen aurrean kantatzeko aukera ematea bertsolariei, bertsolari bakoitzak kudeatzen dituen plazak modu diferentean kudeatzea...

Taldeko telefonoa 692715744 da, eta e-posta, aldiz, hamaikabertute@gmail.com. Bi bide horien bidez kontratatu daitezke saioak, baita taldeari buruzko edozein informazio eskuratu ere.

Antton Alberdik diseinaturiko web orri berritua du taldeak eta, esan bezala, haibat eduki daude bertan. "Pandoraren kutxa" atalean taldekideen bertso idatziak daude; "Badut lagun bat..." atalean, bertutekideek euren iritzia plazaratzen dute hainbat gairen inguruan (azken alean Jon Martin bertsolaria beste bertsolaritza eredu bati buruzko ametsaz ari da); hainbat argazki-album daude ikusgai...

Udarako eskaintza berria ere badute: udako desafioak. Bisitatu web gunea eta gozatu!