Marrazki lehiaketa deitu du Ibilaldiak

Zubi Zaharra Ikastolak eta Bizkaiko Ikastolen Elkarteak III. Ibilarte Marrazki Lehiaketa antolatu dute. Maiatzean, Ibilaldiak antolatuko duen Ibilarte 07 arte erakusketa dela eta, antolatu da lehiaketa hau. Aurtengo Ibilarte Enkarterrietako herrietan zehar egongo da ikusgai, erakusketa ibiltaria izango da. Hainbat artista eta artelan ikusteko aukera izango dugu, gizarte guztietan bezala hainbat sentsibilitate eta aniztasun agerian utziz Euskara eta Euskal Kultura bultzatzeko helburuarekin. Erakusketaren antolatzaileek umeak eta gazteak artera hurbiltzeko aukera bikaina bezala ikusi dute lehiaketa, gaur eguneko eta etorkizuneko artistak euskaraz hezi eta hazi daitezen gura ditugulako.

Balmasedako Zubi zaharra oso elementu esanguratsua da herrian eta Euskal Herriko beste hainbat herrietan gertatzen den bezala historia handia gordetzen du bere baitan. Ikastolaren izenak eta baita ere logoak zubian dute jatorria. Aurtengo Ibilaldiko kantaren izenburua “Zubitik Salto” da, Zubi Zaharretik salto; salto euskararen ibaira!, mundu guztia euskara erabiltzera gonbidatuz. Beraz, aurtengo Ibilarte Marrazki Lehiaketako gaia : Zubi zaharra izango da.

LEHIAKETAREN BALDINTZAK

Marrazkien gaia “Zubi zaharra”

Bi maila egongo dira: 1. maila. 12 urtera bitarteko haurrentzat. 2. maila. 13tik 16 urtera bitarteko gazteentzat.

Marrazkia DIN A4 formatuan aurkeztuko da.

Partehartzaileek marrazkiaren atzealdean izen abizenak, adina, helbidea, ikastola eta telefonoa adierazi beharko dituzte.

Marrazkiak helbide honetara bidali beharko dira:

Bizkaiko Ikastolen Elkartea ( III. Ibilarte Lehiaketa) Aoiz Plaza, 1 48015 Bilbo

Lanak aurkezteko azken eguna apirilaren 20a izango da, ostirala.

Ebaluaketa batzordea lehiaketaren antolatzaileen ordezkari batek, laguntzaileen ordezkari batek eta Ibilarten parte hartuko duen artista batek osatuko dute. Batzordeak aurkeztutako lanak aztertu eta orijinalenak aukeratuko ditu.

Maiatzean, Ibilarte 07 erakusketarekin batera sari banaketa egingo da eta bertan erakunde laguntzaileek emandako produktuak irabazleei banatuko zaizkie.

Lehiaketara aurkeztutako lanak antolatzaileen esku geratuko dira, eta lan horiek zabaldu edo banatzeko baimena izango dute, baita egokiro deritzon komunikazio publikoko sistemaren bidez eta egoki deritzon helburuarekin lanak ezagutarazteko baimena ere.

Abenduaren 13ko 15/1999 lege organikoak, Datu Pertsonalak Babestekoak, ezarritakoari jarraiki, III. Ibilarte Marrazki Lehiaketara aurkezten diren partehartzaileen datuak fitxategi automatizatu batean gordeko dira. Datuak eskuratzeko, zuzentzeko, deuseztatzeko eta fitxategian agertzearen aurka egiteko eskubidea gauzatu nahi izanez gero, antolatzaileekin harremanetan jarri zaitezke.

www.ibilaldia.net