CAF-Elhuyar dibulgazio sariak banatu dira

CAF-Elhuyar sarietako edizio honetan guztira, 13 dibulgazio-artikulu aurkeztu dira, eta beste urteetan baino gutxiago izan arren, epaimahaiaren ustetan aurkeztu duten kalitatea hobea izan da. Hiru sari nagusi eta gazteentzako sari berezi bat zeuden jokoan eta hauek izan dira irabazleak:

• Lehenengo saria: Ubideetako heriotzak. Energiaren berdearen ondorio beltza lanarentzat izan da. Egilea Migel Mari Elosegi Irurtia biologo leitzarra izan da. Irabazleak Imanol Andonegiren eskultura eta 1.000 € jaso ditu lan honengatik.
• Bigarren saria: Sexuen arteko lehia eta bisigua izenburupean aurkeztutako lanarentzat izan zen. Egilea Ibon Cancio Uriarte bakiotarra izan da, eta Andonegiren eskultura eta 500 € jaso ditu.
• Hirugarren saria: Zeri begira zaude? Begiei begira lanarentzat izan da. Egilea Arantzazu Villanueva Larre da, eta Iruñekoa da bera. Imanol Andonegiren eskultura eta 300 € jaso ditu lan horregatik.
• Gazteentzako sari berezia: Xafla iragazgaitza: bike berria artikuluarentzat izan da. Lizartzakoa da kimikari gazte hau, eta Goretti Goikoetxeandia Garmendia du izena. Aurkeztu duen artikuluarengatik 300 € eta Andonegiren eskultura jaso ditu.

Artikulu hauek guztiak apirileko Elhuyar Zientzia eta Teknika aldizkarian irakurri ahal izango dira. Hala ere, www.zientzia.net web gunean aurrerapen bat dago ikusgai.

Zentral minihidroelektrikoen kalteak

Irabazlearen Ubideetako heriotzak artikuluak, zentral minihidroelektrikoen ondorio kaltegarrietako bat aztertu du, oso ezaguna ez dena, gainera: zentraletara ura eramaten duten ubideetan itota hiltzen diren animaliak. Euskal Herrian horrelako ubideen ehunka kilometro ditugula gogorarazten du Elosegik bere lanean, eta ubide horietako hilkortasuna aztertzen du. Horretaz gain, arazoa konpontzeko irtenbideak ere proposatzen ditu.

XIV. CAF-Elhuyar sariak maiatzean jarriko dira abian, eta dibulgazio-artikulei dagozkien sariez gain, dibulgazio-liburu bat idazteko beka ere egongo da jokoan.