Euskara sustatzeko diru laguntzak Gipuzkoako Foru Aldundian
Gipuzkoako Foru Aldundiak euskararen erabilera sustatzeko 2007an emango dituen diru laguntzen deialdia argitaratu da aldizkari ofizialean. Berrikuntzarik handiena: datorren urteko diru laguntzen deia orain egingo dugu. Oro har, eskaerak aurkezteko epea abenduaren 22an amaituko da.
Lehen aldiz egiten dugu deialdia era honetan, urte hasi aurretik alegia. Kalitate prozesuaren emaitza izan da eta bi helburu nagusi ditugu:
- diru laguntzaren jasotzaileari laguntzaren dirua urte hasieran ematea, jarduerak hastearekin batera;
- diruz lagundu nahi ditugun jarduerak aurrera eramateko finantza arazorik ez izatea.
Aldundia berehala jarriko da harremanetan aurreko urteetan gure diru laguntzarik jaso duten udal, erakunde eta elkarteekin, baina komeni da azpimarratzea orain, abenduan eskatu behar direla datorren urterako laguntzak euskararen esparruan.
Guztira, 2.659.570 euro erabiliko dira diru laguntza hauetan, deialdiak hartzen dituen hamalau laguntza motatan. 2006ko diru laguntzen aldean, igoera % 3,9 da.
Deialdia 2006ko azaroaren 27ko Gipuzkoako Aldizkari Ofizialean argitaratu da. Baldintzak, eskaera orriak eta aurkezteko epeak ikus daitezke laguntza mota bakoitzean, Gipuzkoaeuskara.net webguneko laguntzak izeneko atalera joanda.
Zehazki, hauek dira 14 laguntza motak:
- Euskarazko aldizkako argitalpenak
- Euskara sustatzeko proiektu eta jarduerak
- Euskarazko edukiak informazio teknologien bidez hedatzeko proiektuak
- Euskarazko ikus-entzunezko proiektuak
- Euskarazko ikasmateriala ekoizten duten argitaletxeen oinegitura (EIMA)
- Gipuzkoako Lurralde Historikoko ikastetxeetan zabaltzearren euskaraz argitaratutako liburuak hautatzea (EULI)
- Gipuzkoako Lurralde Historikoko udaletan zabaltzearren euskaraz argitaratutako ikus-entzunezko materialak hautatzea (EUBI)
- Unibertsitate gaien oinarrizko euskal liburutegia
- Euskaraz garatutako haur eta gazteen aisialdirako proiektuak
- Euskararen erabilera soziala normalizatzeko udal planak
- Euskal Kantagintzako programazioak
- Kirolaren eta gazteen aisialdiaren alorrean prestakuntza edo hedakuntza izaerako materialak euskaraz argitaratzea
- Itzulpen praktikak egiteko bekak
- Euskararen erabilera alor sozio-ekonomikoan sustatzeko proiektuak eta jarduerak
Argibideak eta xehetasunak ikus daitezke Gipuzkoaeuskara.net webguneko laguntzen laburpen orrian.
Baita ere, kontuan izan behar dira diru laguntzak emateko irizpideak.
Zalantzarik izanez gero, Euskararen Normalkuntzako Zuzendaritza Nagusiarekin zuzenean harremanetan jar zaitezke.
Erantzun
Sartu