Teknologia albisteak

Elhuyar Hiztegiaren edizio berria aurkeztu da

Erabiltzailearen aurpegia
Rakel Lopez - Elhuyar Fundazioa
2006-11-23 : 11:11

Lehenengoz argitaratatu zeneko hamargarren urteurrena betetzearekin batera kaleratu da Elhuyar Hiztegiaren hirugarren edizioa

Elhuyar Hiztegia (euskara-gaztelania/castellano-vasco) obraren hirugarren edizioa aurkeztu da gaur goizean Elhuyar Fundazioaren egoitzan, lehenengoz argitaratu zeneko hamargarren urteurrena betetzen den honetan. Itziar Nogeras Elhuyar Fundazioko zuzendari nagusiak, Antton Gurrutxaga hiztegiaren zuzendari teknikoetako batek eta Lurdes Ansa Elhuyar Edizioak saileko arduradunak eman dituzte hiztegi berrituaren xehetasunak.

Itziar Nogerasek adierazi duenez, “Elhuyar Fundazioaren helburuetako bat euskara garatzeko eta normalizatzeko hizkuntza-baliabide, tresna eta zerbitzuak sortzea eta eskaintzea da” eta “helburu horri tinko eutsiz, urteak daramatzagu hiztegigintzan lan egiten, eta, ditugun hiztegiak eguneratzeaz gain, hiztegi berriak egitea dugu helburu”. Horrenbestez, datorren urtean Elhuyarrek ingelesa-euskara hiztegia argitaratzea espero duela gaineratu du Nogerasek. Antton Gurrutxagak, hiztegiaren zuzendari teknikoetako batek, hiztegiaren xehetasun teknikoak azaldu ditu, eta, besteak beste, esan du Elhuyar Hiztegia egiterakoan bi noranzkoak hartu direla kontuan, hau da, bi hizkuntzak (euskara eta gaztelania) parez pare landu direla. Bestalde, hiztegia eguneratzeko erabili diren iturriak eta irizpideak zein diren adierazi du: Elhuyarren hiztegigintzako datu-basea, Euskaltzaindiaren Hiztegi Batua, Eusko Jaurlaritzaren Euskalterm Terminologia Banku Publikoa, Orotariko Euskal Hiztegia, hiztegi-iturri klasikoak eta berriak, ikerlanak, erabiltzaileen oharrak, kritikak...
Azkenik, Lurdes Ansak Elhuyar Edizioetako arduradunak hartu du hitza, eta hiztegiaren hiru formatuei buruz hitz egin du: liburua, CD-ROMa eta Interneteko bertsioa. Datu esanguratsu gisa azpimarra daiteke, gaur egun, Elhuyar Hiztegiak sarean hileko 300.000 bisita dituela batez beste.

Erantzun

Twitter ikonoa  Facebook ikonoa  Sartu

Publizitatea

Jarraitu sustatu.eus

E-postaz, mezuz mezu:

E-postaz, eguneko buletina:

  • rss ikonoa

»» Aukera gehiago