Juanba Berasategi, 2006ko Abbadia saria
Juanba Berasategi marrazkilari, ilustratzaile eta zinemagileak jasoko dugu 2006ko Anton Abbadia saria.
Fernando Tapia, Gizarte eta Erakunde Harremanetarako Departamentuko foru diputatuak nabarmendu duenez, «Juanba Berasategik egin duen lana eta bere langintzaz, euskarazko zinemagintzaz, alegia, hartu duen konpromiso pertsonala guztiz bat datoz Abbadia sariaren ikuspegiarekin».
Epaimahaiak ere hala baloratu du, aho batez eman baitzuen bere proposamena Juanba Berasategiren alde. Epaimahaian izan dira, foru diputatuarekin eta Xabier Huitzi Euskarako zuzendariarekin batera, Mari Karmen Garmendia, Arantxa Zugasti (Noticias de Gipuzkoa egunkariko zuzendariordea), Rosa Zufia (CICC edo Tabako Fabrikako komunikazio arduraduna), eta aurreko bi urteetako saridunak, Mikel Elorza (Armiarma.com) eta Marian Galarraga (Tinko Euskara Elkartekoa).
Epaimahaiak saria Berasategiri emateko arrazoien artean azpimarratzekoa da «animazioko zinemaren esparruan aitzindari eta maisu izateaz gain, lan handia egin duela euskal zinemaren ekoizleak elkartzen eta proiektu berritzaileak sustatzen. Ilustrazioaren esparruan ere lan bikaina egin du, eta merkatu zinez zail eta lehiakor horretan, bere proiektu guztietan beti gorde duela euskararekiko inplikazio pertsonal handi bat, euskara hutsez jokatuta proiektu horiek bideraezinak direla argi eta garbi jakin arren».
Lanbidearen jardun profesionalaz gaindi, euskararekiko eta euskal herriaren kultur izatearekiko konpromiso pertsonalaren alderdi horiek hartu ditu aintzat epaimahaiak, saria Juanba Berasategiri emateko proposatzerakoan.
Aurtengo Abbadia saria emateko ekitaldia abenduaren 1ean egingo da, urtero ospatzen den abenduaren 3ko Euskararen Nazioarteko Egunaren atariko gisara. Ekitaldia Chillida-Leku Museoan da. Aurkezpenean, Fernando Tapiak bereziki eskertu die Chillida-Leku Museoko arduradunei ekitaldia behar bezala antolatzeko emandako erraztasunak.
Informazio gehiago: www.gipuzkoaeuskara.net
Erantzunak
Abbadia saria jasoko du, azken urteotan -ia 30 urte zinemagintzan- egindako lanagatik. Eguerdian jakin zuen sariaren berri, eta arratsaldean elkarrizketa egiteko prest zegoen.
Animazioa, zinema, teknologia berriak... gai ugari jorratu ditugu elkarrizketa patxadatsu batean Juanba Berasategi zinemagilearekin. Zazpigarren luzemetraia egiteari ekin dion honetan, bere azken urteotako lanen errepasoa egin du Juanba Berasategik irratia.com emankizunean.
Kalabaza Tripontzia Koldo izagirrerekin egin zuenetik, urte mordoska bat joan dira. Eta egun 50 lagun baino gehiago ari da lanean bere proiektu bakoitzean.
Lotura films ekoiztetxea sortu zuen, eta bertatik euskarazko animazioa egiten dihardute. Euskal Herrikoa animazioaren munduan gune oso garrantzitsua dela aipatu digu, besteak beste.
Teknologia berriak eta hizkuntza ere aipagai izan ditugu, noski.
Saioa entzun gura baduzu, klik egin eta atoan jakingo duzu Juanbaren berri. Atsegina izan da elkarrizketa bera ere.
Ba zorionak Juanba!
Egia esan, poztekoa da urteotako lana batenbatek aintzat hartzea.
Marrazki -bizidun, animatu, zinemaratu...- guztiak dantzan hasiko dira.
Ze poza hartu dudan albiste hau irakurtzean.
Sari hau, sari dela pentsatzen hasita eta guzti nago...