Teknologia albisteak

Rikardo Arregi saria Murua eta bere blogarentzat

Erabiltzailearen aurpegia
Sustatu
2006-07-03 : 09:07

Imanol Murua Uria Berriako kazetariak irabazi du aurtengo Rikardo Arregi Kazetaritza Sari Nagusia, bai egunkarian bai Mahai Jokoan blogean Euskal Herriko politikari buruz idatzitako artikuluengatik.

Andoaingo Udalak emandako kazetaritza sarietan beste hiru saritu ere izan ziren:

  • Ekaitz Agirre Berriako Plaza saileko kazetariak jaso du Kazetari Berria saria, mendiari buruz argiratarutako lanengatik.
  • Elhuyar Fundazioko Komunikazio arloko taldeak Epaimahaiaren Sari Berezia, Elhuyar aldizkarian zein Norteko Ferrokarrila eta Tecnopolis irrati eta telebistarako saioetan egindako lanagatik,
  • Pello Zabala apaiz eta metereologoak Ohorezko Aipamena, eguraldiari buruzko informazioari eman dion ukitu pertsonalarengatik eta egin dizkion ekarpenengatik.

Aurtengo edizioan, sarien epaimahaia honako lagunek osatu dute: Jose Inazio Basterretxea, Agustin Errotabehere, Arantxa Urretabizkaia, Mikel Irizar eta Ana Urkiza.

Sari nagusiari dagokionez, epaimahaiaren esanetan, bikain ari da Murua: Elkarrizketetan sendo, erreportajeetan argi, iritzi formatoan zorrotz eta zintzotasunez jokatuz. Aipagarria da nola asmatu duen bere bloga erabiltzen paper euskarriko lanaren osagarri.

Muruak blogean dioenez, aste batzuetan etena hartuko du. Baina ez da sariaren 9.000 euroekin hanka egin duelako, oporrak egokitu zaizkiolako baizik.

Berrian elkarrizketa laburrak daude irabazleekin artikulu honetan.

Erantzun

Twitter ikonoa  Facebook ikonoa  Sartu