Teknologia albisteak

Euskal Tonbolaren azken txanpa: Nafarroa

Erabiltzailearen aurpegia
Itxaso Ferreras - Kontseilua
2006-04-06 : 09:04

Euskal Herri osoan ia 100.000 sari banatu ostean, Nafarroara iritsi da Kontseiluaren Euskal Tonbola. Nafarroa da, hain zuzen ere, Euskal Tonbolaren azken geltokia. “Euskal Herriko txoko guztietan zabaldu dugu gure ekimena, joko baten bidez euskara sustatzeko”, aurkezpena eman diote Kontseiluko ordezkariek.

Apirilean eta maiatzean zehar, Nafarroako Gobernuaren onespenarekin, Euskal Tonbola Nafarroako 120 tabernetan izango da salgai. “Euro baten truke hainbat sari jasotzeko aukera ematen du”, azaldu dute. Sarien artean Menditerraneoan zeharreko kruzero-bidaia, argazki kamera digitalak, asteburuak landetxeetan, sakelako telefonoak, talasoterapia sarrerak, MP3 irakurgailuak eta DVDak daude. Guztira, 100.000 txartel banatuko dira, eta “bost txarteletatik bat sariduna da” ohartarazi dute.

Tabernetan jarri dituzte salgai txartelak herritarrekin ‘gertutasuna’ lortzeko. Gainera, sariak tabernetan utzi dituzte, “herritarrak bertan jasoko du bere saria” . Euskal Tonbolaren funtzionamendua oso erraza dela azpimarratu dute Kontseiluko ordezkariek: “txartela hazkatu behar da sariaren izena ikusi ahal izateko, eta ondoren tabernariari irabazitakoa eskatu”.

Euskararen Gizarte Erakundeen Kontseiluak Euskal Tonbolarekin lortuko dituen etekinekin euskararen normalizazioan aurrera egiteko proiektuekin jarraituko du. “Gainera, nork bere konpromisoak sustatzea gustatuko litzaiguke, horretarako, txartel bakoitzean gizarteak eguneroko bizitzan hizkuntzaren alde egin dezakeen adibide bat txertatu dugu”.

2005eko maiatzetik hona Euskal Herriko 250 herrietan eta 1.400 taberna eta kafetegi baino gehiagotan zehar ibili da Euskal Tonbola, eta harrera ‘oso ona’ izan du. “Euskaldunen erantzuna bikaina izan da, euskararekin konprometitu dira, eta ziur gaude Nafarroako gizarteak ere dagokion eran erantzungo duela”, adierazi dute Kontseiluko kideek. Azken honekin, Euskal Tonbolak Euskal Herriko ibilbidea osatuko du. “Orain arteko arrakasta handiaren adierazgarri, uda aldera Euskal Tonbola bigarren aldiz abiatuko da, baina guztiz eraberriturik”, aurreratu dute.

Herriak

Hauek dira Euskal Tonbola salgai izango duten herriak, besteak beste:
- Ipar-ekialdean: Abaurregaina, Oionz, Orbaitzeta, Otsagi, Garralda, Jaurrieta-Eaurta.
- Iruñerrian: Antsoain, Iruñako alde zaharra, Atarrabia –Villava, Barañain, Donibane, Errotxapea, Etzabakoiz iparra, Jaurrieta Eaurta, Txantrea, Uharte, Zizur.
- Sakanan: Altsasu, Arbizu, Arruazu, Etxarri Aranatz, Irurtzun, Lakuntza, Olazti, Uharte Arakil.
- Bortziriak: Arantza, Bera, Igantzi, Lesaka, Sunbila.
- Malekerran: Doneztebe, Oronoz Mugaire.
- Baztanen: Elizondo, Irurita, Urdazubi, Garralda, Arizkun, Elbete, Erratzu.
- Hegoaldean: Gares, Lizarra.
- Goizuetan: Goizueta.
- Leitzaranen: Leitza.
- Larraunen: Lekunberri.
- Agoitzen: Agoitz.


Erantzun

Twitter ikonoa  Facebook ikonoa  Sartu

Publizitatea

Jarraitu sustatu.eus

E-postaz, mezuz mezu:

E-postaz, eguneko buletina:

  • rss ikonoa

»» Aukera gehiago