Libre da azkenean Bilboko metroan argazkiak egitea
Zerrenda euskaldun batean jakinarazi denez Bilboko Metroko langileek instrukzioak jaso dituzte, ez aurrerantzean inori eragozteko argazkiak egitea. Lorpen polita: polemika ere bazebilen sarean debeku absurdo horrengatik, eta Flickr-en debekatutako argazki piloa ere bai.
Jabi Zabalaren Sarean.com blogean atera zuen kontu hau duela aste batzuk. Debekua kritikatzeaz gain, ebidentzia bat ere aipatzen zuen Zabalak: kasu zipitzik egiten ez zioten argazkilariak egon bazebiltzala, baita Flickr-en antolatuta ere.
Ondoren, gaztelaniazko blog batean ere azaldu zen kexua.
Baina protestak azaldu diren tarte honetan, Metro Bilbao erakundean aldaketak ere izan dira, eta EITBn lan egiten zuen Julio Ibarra kazetaria da orain Metro Bilbaoko komunikazio arduraduna. Beharbada, argazkilariekin eta internautekin hobeto konpontzea komunikazio politika hobea dela ikusi du Ibarrak.
Ea beste toki publiko batzuetan ere argazki debekuak gainditzen diren. Bilbon bertan, diru publikoak (eta sarrera bakoitzeko txartelak) ordaindutako Guggenheim museoaren barruan hau bezalako argazkiak egitea debekatuta dago.
Erantzunak
Burdinbide zalea naiz eta benetan pozten nau albiste honek. Ohitura daukat trenei argazkiak ateratzeko eta orain metrora lasaitasun osoz jeitsi ahal izango naiz.
RENFE eta FEVE-k ere jaramon egingo al dute? Jendeak ezagutzen al du zaleon aurka ADIF-en segurtasun zaindariek duten jarrera gogorra?
Bide batez, aipatu debekua kentzen lehena Euskotren izan zela, orain hainbat urte argazkiak ateratzeko baimen beharra kendu zuen eta.
Utziko didazue propaganda piskat egiten. Burdinbide zaleon euskarazko web bakarrenetako bat bisitatzera gonbidatzen zaituztet: http://www.gerok.net
Bai, halaxe da eta uste dut, anekdotikoa izan badaiteke ere, blog batean idatzitakoak ekar dezakeen eraginaren adibide bat dela. Euskal blogosferak, gehiago edo gutxiago, eraginen bat duela frogatu du erabakiak.
Azken finean dena da ardura horretan (kasu honetan Julio Ibarra) dagoenaren jarrera edo izaeraren araberakoa, feedback-a kontutan hartzea edo ez, blogosfera jarraitzea edo ez, jendearen iritziak kontutan hartzea edo ez. Hamar urtez, blogetan ez baina bai kalean-eta, komentatuko zuen norbaitek zeinen absurdoa zen argazkiak egitea galarazten duen arau hori. Eta hamar urtez hori egiteko aukera izan dutenek ez dute araua aldatu. Komunikazio zuzendari berria sartu eta berak aldatu du.
Beraz, zorionak Ibarrari, blogarioi eta, batez ere, argazkilarioi.