Kontseilua, UEMA eta Mankomunitatearen arteko elkarlana Sakanan

Gaurdaino Sakanako 41 entitatek eskuratu dute Bai Euskarari Ziurtagiria. Enpresek, saltokiek eta era guztietako entitateek beren erakundeetan hizkuntzaren normalizazioa erdiesteko neurri eraginkorrak hartu eta betetzen ari direla adierazten dute, eta egiten duten ahaleginaren aitortza da.

Elkarlan honen garrantzia azpimarratu dute, “lehendik egiten ari zen lana osatzera baitator”, azaldu du Kontseiluko bozeramaileak, Aitziber Bergarak. “Sakanan euskararen normalizazioa lortzeko beharrezkoak dira herritarren atxikimendua, entitateek urrats eraginkorrak egitea eta instituzioen eta euskalgintzako erakundeen lankidetza”.

UEMAk, bere aldetik, horrelako proiektuak aurrera atera ahal izateko herritarren partaidetza ezinbestekoa dela adierazi du. “Alferrik izango dira beste taldeen egitasmoak herritarrek ez badute beren erantzukizuna hartzen euskararen berreskurapenean”, azaldu du UEMAko ordezkariak, Miren Segurolak.

Mankomunitateak 4 urte daramatza gizarte eragileekin lanean, horiek konpromisoen bidez euskararen normalizazioaren alde lanean aritzera gonbidatuz. “Lankidetza hau garrantzi handiko beste aurrerapauso bat da gure zereginean” adierazi du Mankomunitateko ordezkariak, Izaskun Razkinek.

Etxarri Aranatzen, 2006ko urtarrilaren 13an