Euskararen Nazioarteko Egunean

Eusko Ikaskuntzak Euskararen Nazioarteko Eguna (ENE) ospakizunerako bere egitaraua aurkeztu du. Eusko Ikaskuntzak berak 1948an sortutako Eguna modu berezian eratu nahi du edizio honetan eta horretarako Internet erabiliko da, eta EuskoSare izango du plataforma. Urteroko abenduaren 3an egiteko sortu zen Eguna, data horretan San Frantzisko Xabier jaia ospatzen delarik. “Eginen da ez bakarrik Eskual Herriko hiri, herri ta herrixketan, bainan ere, Euskal Herritik kanpo, hurbil edo urrun, eskualdun multxoak aurkitzen diren bazter guzietan” zioen 1949ko Egunaren aldarrikapeneko agiriak.

Ospakizuna Abenduaren 3an bada ere, EuskoSare web orrian azaroaren 22tik jarri da material osoa bisitarien aukeran. Abenduaren 4an balantzea egingo da, nahiz eta web orriak zabalik iraungo duen.

Euskararen gaineko AITORPEN bat jarri da irakurgai www.euskosare.org web orrian, beren atxikimendua azaldu nahi duten guztientzat irekita. Halaber, internautek testu txikiak bidal ditzakete, euskararekin lotuta beti.

Aipatutako web orri horretan, bestalde, entzungai jarri dira diskurtsu interesgarri batzuk, besteak beste Bernardo Atxaga eta Jesus Altunarenak, euskaldunon bizitzan euskarak duen garrantziaz ohartarazteko. Modu berean, ENE-ren inguruko zenbait testu historiko irakur daitezke..

Abenduaren 3an, berriz, SMS eta e-posta bitartekoekin kanpaina globala egingo da, honako mezu hau helarazteko: “Eutsi euskarari!” hizkuntza desberdinetan. Ekintza hau Euskal Herriko euskaldunek ez ezik baita kanpokoek ere egin ahal izango dute.

Ospakizuna modu desberdinez jarraituko da munduan. Esaterako, Mar del Platako Denak Bat Euskal Etxean Euskara Astea antolatu dute eta abenduaren 2an ekingo diote, Euskararen Nazioarteko Egunaren bezperan. EuskoSareko Mintzabidea Komunitateak ere zenbait ekintza antolatu ditu.

Ospakizunarekin bat egin dute Euskosareko Irratia Komunitateko zenbait emisorak. Horrela, ENE-ren mezua Euskal Herrian ez ezik kanpoan ere dibulgazio berezia izango du. Helburua, euskarari buruzko aldarrikapenarekin bost milioi pertsonengana iristea da.

ENE-ren irudia ere sortu da, aurtengo edizioan eta hurrengoetan Eguna identifikatzeko erabiliko dena. Nestor Basterretxea euskal artista unibertsala izan da egilea.