Literatura eskola Aiherran

Egunon danori

Urriaren 15eko lehen Eskolan esan legez eta ekainean erabakitakoa aintzat hartuz, Literatura Eskolaren 05/06ko bigarren saioa Larrabetzutik kanpo egingo dugu. 2003ko urrian sortu zuen bihotz bakartien klubak Larrabetzuko Literatura Eskola. Ordutik Literatura Eskola bihurtu da. Hasiera hasieratik txokokerietatik itzuri egin eta Euskal Herrira zabaltzea izan da helburuetako bat eta praktikotasunagatik eskolarik gehienak Larrabetzun egiten ditugun arren, bertan gaudela egongo gara Aiherran datorren azaroaren 12an, urtarrilaren 21ean Iruñean eta maiatzaren 20an Izuran egongo garen antzera. Azaroaren 12an Aiherran batuko gara eta Emilio Lopez Adan Beltzarekin batera, literatura existentzialistari buruz arituko gara, gehienbat Albert Camus eta Jean Paul Sartreri buruz. Bi autoreok lehenengo eskolan berbagai izan genuen Txillardegiren eleberrietan izan duten edo ez duten itzalaz ere memoria egingo dugu. Guretzat oso garrantzitsua izango litzateke Lapurdiko, Baxenafarroako eta Zuberoako literaturazaleak Aiherrako eskolara etortzea etorkizunean elkarrekin lan egiteko aukerak aztertu ahal izateko eta, prefosta, oraindik zurrunegiak ditugun mugak apurtzeko.
Goizeko 11:00etan hasiko gara eta bertan 15 euroren truke bazkaldu ostean, arratsaldean tertuliatxoa egingo dugu.
Etorri gura duenak arrekikili@gmail.com helbidera mezua bota eta izena eman beharko du

Literatura Eskola 05/06