Teknoskopioa, asmatzaile gazteentzako sariketa, jarri du martxan Elhuyar Fundazioak

Azaroan egingo den aurtengo Zientzia eta Teknologiaren Astearen barruan, Batxilergoko eta Lanbide Heziketako ikasleentzako sariketa bat jarri du abian Elhuyar Fundazioak: Teknoskopioa, asmatzaile gazteentzako sariketa. Sariketa horretarako, ingurune adimendunen gaia hartu dugu ardatz. Gehienez lau laguneko taldeek hartu ahal izango dute parte. Parte-hartzaileek imajimatu behar dute ingurune adimendunen arloan lanean ari diren ikertzaileak direla. Ikertzen denbora luzez ibili ondoren, gizartearentzako aurrerapauso handia ekarriko duen asmakuntza bat aurkituko dute, eta aurkikuntza horren berri aurkezpen baten bidez eman behar dute biltzar batean. Proposatzen duten aurkikuntza horrek ez du zertan erreala izan, imajinazioa izango da sarituko dena; hori bai, ingurune adimendunei buruzko informazioa erabili behar da proposamenak argudiatzeko. Horretarako, egun dauden aplikazioetan oinarritu daitezke, eta erabilera berriak, eremu berriak imajinatu...

Parte hartu nahi dutenek aurkezpen bat prestatu behar dute. Hori egiteko informazioa, arauak eta adibideak honako helbide honetan egongo dira: www.zientzia.net/teknoskopioa.

Irabazleek iPod bana jasoko dute (mp3 irakurgailu bana). Gainera, irabazleak eta beraien gela guztia Vicomtech zentru teknologikoa bisitatzeko aukera izango dute.

Lanak euskaraz aurkeztu beharko dira, urriaren 27a baino lehen. Sariketa honen babesleak Fagor eta Vicomtech dira.