Musikaire eta Cibelle, Elorrion
Musikaire Udako Jaialdiak Elorrion azken txanpara iritsi da. Asteburu honetan, udako jaiialdien seigarren asteburua izango da, eta azkena. Baina azken txanpa ere indartsu joko du Musikairek, izan ere, ostiral gaueko 22:30etan Cibelle izango da Elorrion, Brasilgo artista distiratsua. Hori dela eta, Radio 3 irratiak oihartzun handia eman dio ostiraleko kontzertuari, eta zenbait telebistak iragarri dute Elorrion izango direla, Cibelle-ren kontzertuaren irudiak hartzeko.
Cibelle
Cibelle Cavalik 27 urte ditu, eta brasildarra da. Edonora doala, sekulako ikusmina sortzen du, bera izango baita gaur egun Brasilen sortu diren artisten artean originaletako bat. Abeslari da, musikagile, poeta, zinemagile, modelo
Cibelle 17 urterekin hasi zen musika sortzen Sao Paulo inguruan. Lehen diskoa Sao Paulo Confessions 1999an kaleratu zuen, Suba produktorearekin batera. Horren heriotzak, ordea, bi urtez isilarazi zuen Cibelle, harik eta Apollo 9 produktorearen laguntzarekin beste disko bat egin zuen arte Cibelle, aditu askoren ustez maisulan paregabea, hainbeste ze BBCk hautatu egin baitzuen Award World Music sarietarako, New corner atalean.
Aurten bertan, uztailean, Cibellek disko aurrerapen bat atera du About a Girl, laster kaleratuko duen album berriaren aldarri.
Asteburuko egitaraua
Cibelle-rekin ez da bukatuko Musikaire. Larunbatean, gaueko 22:30etan, Celtish taldea izango da Tola jauregiko lorategi ederrean. Eta igandean, azken errematea, hori bai. Clownx Teatre taldeak emango ditu On Kixoteren pasarte hautatuak, modu entretenigarrian. Izango da herriko frontoian, arratsaldeko 19:30etan.
Azken balantzea
Musikaireko antolatzaileak pozik daude aurtengo edizioarekin, bete egin direlako aurrez egindako kalkuluak. Bi gauza nabarmendu dituzte, hala ere:
- Ikusle kopuru handia. Aurreko urteekin alderatuz gero, ikusi da aurten jende gehiagok parte hartu duela emanaldi guztietan.
- Emanaldi aipagarriak. Emanaldi guztiek maila oso ona erakutsi dute, baina beharbada hiru nabarmendu dira bereziki: Las Migas taldearen kontzertua, Terrafolk esloveniarren emanaldia, eta dantza ikuskizun sorta.
Erantzun
Sartu