Tourraren gaineko blog euskalduna on-line
Aurtengo Tourra ate joka dugula eta bloga sortu dugu Goiena.net-eko blog komunitatean. Besteak beste, kazetariek, txirrindularitza zaleek eta txirrindulari izandakoek idatziko dute bertan.
Etapei buruzko kronikak eta tourraren gaineko berri helbide honetan aurkituko duzue: http://www.goiena.net/blogak/txirrindularitza
Zapatuan, uztailak 2, hasiko da 2005eko Tourra. Zapatutik aurrera, etapa bakoitzaren kronika aurkituko duzu www.goiena.net/blogak/txirrindularitza blogean. Goienako Gorka Etxabe kazetariak egun bakoitzeko etapa laburbilduko du. Ez da horretan bakarrik ibiliko, hala ere.
Hainbat kolaboratzaile
Tourrak aurrera egin ahala etorriko dira kolaboratzaile gehiago, esaterako: Jone Muxika (txirrindulari ohia), Juan Martin Elexpuru (txirrindulari zalea), Joxe Aranzabal (irakaslea eta blogaria). Eta beste hainbat kazetari, filologo eta abarreko, denak txirrindularizaleak: Jokin Etxabarria, Xabi Urtzelai, Oihana Elortza, Eneko Azkarate, Jon Unamuno, Sergio Azkarate...
Erantzunak
Julen Gabiria idazle, blogari eta txirrindularitzako izar zaharren miresleak ere blogean idatziko du Tourraren gainean. Nire Butakatxotik idazteko eskatu diote Berria egunkaritik, eta iruzkin horiek blogean ere idatziko dituela dirudi, hemen kontatzen duenez.
Goienako Txirrindularitza blogean, Joxe Aranzabalek karreristen inguruko blog sorta baten berri eman du.
Aurreko iruzkinekoa zuzenduz, bestalde, esan behar da Gabiriaren Berriako tartetxoak ez duela nire butakatxotik izena (hori garai batean Mikel Elortzaren kirol iruzkinak argitaratzeko erabili izan zuen Euskaldunon Egunkariak), baizik eta Ramonen tabernatik.
Zorionak, ekimen polita. Aurki agregadoreko Albisteak atal jeneralista berrian gehitu dugu.
Kiroletako sekzioa mereziko luke euskal blogosferak edo jario-multzoak, baina inork ere ez du holakorik egiten, salbu eta Goienak berak. Realaren gaineko bloga izan duzue martxan, baina, uste dugu orain iraungi egingo dela, ezta? Bitartean, nola informazio orokorreko edo gaurkotasuneko iturrietan, euskarazko hedabideak ez diren lartxo busti (Sareko Argia atzo ausartu zen arte), ba Txirrindularitzako blog hau oraingoz hor sartuko dugu, uztaileko lehen hiru asteetan behintzat eguneroko notizia bizia izango delako...
Gero ikusiko dugu ea bizitasun gehiago ematen diozuen, eta ea kirol iturri gehiago ageri diren Interneteko esparru euskaldunean.