Vocentoren webgune euskaldun hilak, Euskararen Berripaperean nabarmen
Vocento taldeak euskaraz Interneten egindako webguneen berri ekarri du, bere azken bi aleetan, Euskararen Berripaperak, Eusko Jaurlaritzako HPS-k banatzen duen hilabetekariak. Hilda dauden proiektuak, informazio freskoz osatuak baleude bezala aurkezten ditu Berripaperak.
Apirilean Zuredirua.com eta Gaurkoenpresa.com famatu zituen Euskararen Berripaperak: Euskarazko berriez hornitutako web atarien eta aldizkari elektronikoen saila aberastuz doa egunetik egunera. Oraintsu, bi dira aurretiaz sortutakoen zerrendari erantsi beharrekoak: www.zuredirua.com eta www.gaurkoenpresa.com.
Maiatzekoan, berriz edizio digitala baino ez duten agerkarien zerrenda bat zekarren buletinak, eta Sustatu aipatzeaz gain (bereziki hizkuntzari dagokio weblog honen gaia, Berripaperaren iritziz), berriro zetozen Zuredirua eta Gaurkoenpresa, eta beste produktu bat ere bai: AlbisteakSMS.com
Berripaperaren esanetan, informazio mordoaren jabe izateko aukera dugu, etxetik bertatik, aurrez aipaturiko berriemaile digital horien bidez.
Kontua da, ostera, ez dirudiela Berripaperaren erredaktoreek edo HPSk asko bisitatzen dituztenik Vocentoren agerkari digital hauek. Hilda daude: itxura guztien arabera ez dute berrikuntzarik izan iaztik. Hiru guneak webgune estatiko izateko traza daukate, teknologia dinamikorik gabeak itxura batean, eta eguneratu gabeak guztiz.
Albisteak datatu gabe daude Zurediruan eta Gaurkoenpresan, baina edukiei erreparatuta iazko kontuak direla ikusten da. Egutegiko azken sarrerak urtarrilean dira batean (gainera, aldez aurretik idatzitako prebisioak dirudite, ez 2005eko urtarrilean benetan osatu den ezer) eta iazko ekainean, duela urtebete, bestean. AlbisteakSMS delakoak azken eguneraketa 13.00etan izan dela dio, baina berdin dio noiz bisitatzen duzun: beti eguerdiko ordubatetakoa da azken eguneraketa hori; zein egunetakoa, ez digute esaten. Hala ere gunearen albisteen zerrendan ikusten denez, Arabakoan iazko urrikoak dira azkenak, eta Bizkai-Gipuzkoaren kasuan iazko abuztukoak.
Aipatutako hiru webgune hauek, Vocento taldeko Vocento Mediatrader enpresak eginak dira.
Erantzunak
Zure dirua laburdura da. izan ere, benetako izena honako hau omen da. zure dirua lapurtu dugu euskararen alde ezdakitzer egiteko, baina trankil honek ez du ezertarako balio. Euskaldun alprojak, euskaraz nabaigatu, euskaraz berri ekonomikoak jaso, euskaraz lan egin, ...
Nori bururtatu ote zaio euskaldunok holakorik egin ahal dugula zer eta baskoz? Mesedez, hau hartu dirua eta korrika egin filmaren bertsio kutre etabaskitoa baino ez da. Lotsagabeak!!!!
Hator ataria diozu? zine karteldegia begiratzera joan eta Bergarako Novedades aretoan La mala educación dagoela ikusgai jartzen duen horretan, Novedades aretoa gutxienez orain dela pare bat hilabetetik itxita dagoean? Bai ederra Vocentoren euskarazko atari hori ere.
2004ko urrikoa da, zuredirua.com-en sartu eta agertzen den lehen berria, "Europako Burtsen Iruzkina" dion hori. Orduan zegoen Ibex-35 hor aipatzen den mailan.
zuredirua.com deitze hori, akaso, Jaurlaritzaren diru laguntzak eskuratzeko asmoagatik jarri diote web gune horri, auskalo !
harrigarria da euskal erakundeek Vocentorekiko erakusten duten errespetua eta miresmena. gorazarre zurediruari !